يا لوعت الزهره ..... صاحت يبو العتره..لوعني فرقاك بويه

مهمومه من بعدك ..... ريت أسكن ابلحدك..و أتوسدك اوياك بويه

يطيف الما يباريح صحوتي و نومي ..... يمن بغياب وجهك غابت انجومي

جزاك اللوم ما تسمع بعد لومي ..... يبو ابراهيم و انته آخر اهمومي

اعله راسك شفت طير النايبه ايحومي ..... قبل يومك صحت ريت انختم يومي

ريت انحمل نعشي ..... بيه الأجل يمشي..و ايضمني مثواك بويه

موتي قبل موتك ..... يحملني تابوتك..و أتوسدك اوياك بويه

حمامه و سيف فقدك كسر اجناحي ..... أصيح ولا نفع يالمصطفه اصياحي

ابدمع ليلي اجرحت وجنات مصباحي ..... و عله افراقك توالف صبري و انياحي

جفن عينك غفه و بس جفني ظل صاحي ..... سهرت الليله اعد اهمومي و اجراحي

فقدك خطف لوني ..... و امساهره اعيوني..و عين الله ترعاك بويه

ريت اليلوموني ..... ابقبرك ينزلوني..و أتوسدك اوياك بويه

سكن ليل المصيبه و هودرت دنياي ..... ألف آه اعله هضمي و لوعتي و بلواي

جنت وياك أمس و انته جنت وياي ..... هالليله غبت يالهادي عن عيناي

اندهل فكري بويه و عندي ما ظل راي ..... صرت سجت عتب للرايح و للجاي

فقدك هضم حالي ..... محرابك إقبالي..موحش بلياك بويه

وسفه انخسف بدرك ..... ريت أنزل ابقبرك..و أتوسدك اوياك بويه

يريت البين أخذ روحي قبل حيني ..... و لا هالموت يفصل بينك و بيني

عندي اشظل بعد ظل بس دمع عيني ..... و نذير الموت يم قبرك يتانيني

عصف ريح الحزن و انتثرت اسنيني ..... عسن دفانتك وياك تخفيني

لو ناشدت عني ..... ما فارقت وني..ابكل ونه ألكَاك بويه

و تحقق اظنوني ..... لمن يدفنوني..و أتوسدك اوياك بويه

يبويه اعليك أنوحن ليلي و انهاري ..... و تخاون بالبصيره دمعتي و ناري

ابكثر ما أنتحب مل و جزع جاري ..... سكنت ابيت الأحزان و عفت داري

أحاجي الروح أقلها القبرج إختاري ..... عساه البين أخذني و يخفي آثاري

بعيوني عبراتي ..... و ابقلبي جمراتي..تجمعها ذكراك بويه

ما ينحمل همك ..... ريت أندفن يمك..و أتوسدك اوياك بويه

شبح صوتي اختفه و بدموعي ناديتك ..... أموت آنه و تعيش ابدالي يا ريتك

بالسم و السيوف اتموت ذريتك ..... و آنه أول ضحيه من أهل بيتك

الأجل يوحي لي جني الحفرتك جيتك ..... بعد جم يوم و احسبني تعنيتك

يالسدرك ادموعي ..... كافورك اضلوعي..لتصدق أنساك بويه

اترابك يتانيني ..... لابد يواريني..و أتوسدك اوياك بويه