عايش جرحج بين ادموعي...يالگبرج ما بين ضلوعي

احاجي ابروحي و ادموعي جمر تهوه...صدگ بيدي ادفنت ضحكاتج الحلوه

ال يشاهدني ابفرگتج فاطمة اشسوه...يلاگيني ينادي هوّه مو هوّه

تايه صبري و لا مو طوعي...يالگبرج ما بين ضلوعي

مشدوها ابمثل لون الجرح لوني...بعد ضلعج يزهره ماتت شلوني

الدمع و الهم يودوني و يجيبوني...قررت امن ادفنج ادفن اعيوني

طفه الموت اليوم اشموعي...يالگبرج ما بين ضلوعي

صدگ للمگبره يالزهره تاليتي...معقولة اشيليج يا بعد بيتي

شأخذتي وياج من عمرج شخليتي...بقه دمعي و اخذتي وياج عافيتي

راح ايظل فگدج موضوعي...يالگبرج ما بين ضلوعي

ألم نشرح لك صدرك جنت اقره...بالمسجد سمعت ابصدرج الكسره

شفت جويات اديج ابابج و جمره...شتحمل لون بيّه علي عشره

شابح وجهي ابدهشة نوعي...يالگبرج ما بين ضلوعي

دموعي يا حبيبة عمري محيها...بأسم الضلع مجراها و مسراها

الأمانة استُرجعت ناديت يا طاها...أم زينب اجتك روحي وياها

بعدج من يعرف موجوعي...يالگبرج ما بين ضلوعي

ابأمان الله اودعج و انه من الآن...يم بيت الاحزان ابني لي بيت احزان

اشيل الباب گمت اكرهن البيبان...حي اشلون عايش و انتي بالتربان

ابلا نهرج يابس ينبوعي...يالگبرج ما بين ضلوعي