نذرت سنيني الك يوليدي ربّيتك...وبوسط الگلب يا الغالي خليتك

تجازيني مثل ما آني جازيتك ؟...تدري الكربله يعيوني ظميتك

ناذرتك العمّك نذر...وبكربله توفيني

حگ إرباي تدري إشلون يتجازه...دمك للحسين يوفّي كل عازه

يَمَن حبك الگلبي والنفس حازه...تجي روحك إلي وتشيل الجنازه

لو خلص عمري يالولد...برويحتك تلفيني

يبني بكربله بدماك تتحنّه...جابوك وثگيله بمهجتي الونّه

بالگوّه اعله جسمك يبني أتدنّه...رگد حيلي وردت كل عمري أودعنّه

شمّيتك وشفت الدمع...ياسلوتي يچويني

وصيّه امن الحسن موتك اليفجعني...أنذرك للسيوف إلّي تگطّعني

كفو منك ييمه اوليدي تسمعني...يرفعة راسي أودعك هم تودعني

تسمعني ريتك ياشهم...يا جاسم تباريني

أعوفك مو بديّه الشام تتنطر...أعوفك وانسبي وبعمري أتكدّر

يجسام ودليلي مثلك إتوذر...عرسك صار نوح وفرحتك منحر

حنّيت چفّك بالدمه...ودموعي التواسيني

حقهه الوالده اعله الولد تتألم...وآني بگلبي تسعر نار المخيّم

صيوانك أذكره ودمعتي من دم...إذا مو بيك بيمن يالولد أحلم

انته بمنامي ويقظتي...ياظنوتي اتحاچيني