في إحراق دار مولانا أبي عبدالله الصّادق (ع)

الوزن : فائزي

جعفر الصَّادق من نظر حرگوها للدار

سالت دمِعْته او مُهْجته سِرْحت بلَفْكار

تحچي الروايه عن خبر ما منه أفجع

عن حادثة حرْگ او جمُر بالمُهجه تلسع

ما بين ابو الكاظم يصلّي لنّه يسمع

صايح يصيح النار وجَّت يبن لطهار

حين اللي تمّم فرضه والناره طفاها

ناح او تحسّر و احترگ گلبه ابلظاها

او شفنه الإمام اتكتّر اوعينه جراها

او روحه الشريفه هامت ابْعالم الأكدار

لصْحاب إجُوه او رادو ايعظمون أجره

گالوله ماهُو اجديد إذا الطاغي تجرّه

حرْگوها گبل اليوم دار امّك الزهره

إصبر مثل ما صبر گبلك علي الكرار

گال ادري گبلي عالزچيّه حرْگوْا الباب

وادري مُصاب الزهره أعظم من هلِمْصاب

لاچن يظل منظر أبد عن عيني ما غاب

ميْصير أبد بعده ولا گبله جره او صار

هاجت عليّه احزانّي لمّن شافت العين

من حجره لي حجره غدت تجري النساوين

ذكّرني هالحال ابْفَرَار اطفال لحْسين

لمّن خيامه اتوجّرت و اشتعلت النار

كل ما أشوفن نار ترجع بيّه الأياّم

وانظر اگبالي اتراكضت بالدهشه ليْتام

لا وين تنطي اوجوها الما ظل لها اخيام

والعسكر اعلها هجَم من كل لكتار

و الصايح ايْصيح اعله خدْر العيله فرهود

او زين لعْباد ابعلّته بالخيمه موجود

او زينب ابحيره ظلّت او تخمش بلخدود

باليمنه تشگف سوطها او تستر بليسار

و أنه حريمي احتارت ابرغم اهْيه ويّاي

واشما يصير امن الهضم يبگون بحْماي

چا شنهو حال اللي بگن تالي بلا رَاي

وحاميهن ابكثر المرض من علّته اِنهار