موعد عندي اويه حسين...هاي المسية

قضه عمري بدمعه و حسره و نوحي اعليهم ليل انهار

سره ضعن أحبابي و ظلت لمن راحوا وحشة الدار

دوه جرحي الينزف عندهم لكن منهم ما كو أخبار

جزه صبره احدودي و عنهم قلبي الينشد ظل محتار

من رد ناعي الغياب...رجعوا قلت الأحباب

خل تشبع شوف العين...قبل المنية

مشتاقه و تربي اعيوني و ظليت أحسب بالأيام

و أتعذب لو جن ليل و تسرح روحي اويه الأحلام

مرعوبه اتفز اجروحي و آنا المثلي اشلون اتنام

ما بين الطف و امصابه و بين مصابي الحل بالشام

آني و قلبي المحتار...منتظرين الأخبار

عافوني ابين أمرين...آنا اشبدية

و الموت الناس اتكره و آنا أتمنه ايمرني ابساع

يتأمل ساعة ملكه عمري الخلص كله اوداع

صدقني أشريك بروحي بيوم الشالوا لو تنباع

بس ملقه أحبابي ايفسر حلم اسنيني الراح و ضاع

آني و انت الظليت...و اترجيتك ما جيت

ردتك تجمع قلبين...حنن سوية

عودني حسين ايقلي اشلونج يّمه ابكل مصباح

هالجلمه اتبرد قلبي اتسكن آهاته و يرتاح

ودعني و جان احسابي ايعود اعليه الغالي الراح

روحي و روحه اليتلاقن ملقه أحبابي الهم ينزاح

وعد الباري المكتوب...يجمعني اويه المحبوب

يعلم بين الأثنين...طبق السجية

و الملك الياخذ روحي جايب أمر الله و مأمور

و اتعجب شاهد حاله شاف اعليه النور ايدور

سبّح للباري و زاره يا رب إلمن هذا النور

هاي البضعه المظلومه حضرت أم ضلع المكسور

صاحت وفيتي اوياي...ساعة توديعج هاي

و المقطوع الجفين...بالغاضرية

قلت إلها الاسمج فدوه آنا اوليدي كلنه انروح

يالبضعه أتمنه بقلبي بكثر اجروح حسين اجروح

يا ريته اتهشم صدري قبل المهشوم المذبوح

يا ريت اليسلم راسه و راسي ابرمح العالي ايلوح

و الفجّر دمع ابجاي...قالوا ما ضاق الماي

جبدي و جبده بنارين...تلهب سرية

قلت إلها اوياج اخذيني للحسين الغالي اشتاقيت

سالم ظنيته ايعود و ليالي الجيته اتربيت

حنيت و أرد أشتمه من قد ما نحت وونيت

خاف امقصره و يعذرني ما يكفي اشقد ما وفيت

طعم الجنة بملقاك...من أقعد آنا اوياك

يالمثلك يحصل وين...جنة زهية