هيه و الزجية...جلسه فاطمية

تلتقي الليله الحبيبه بالحبيبه...و الغريبه تشعر بحال الغريبه

ايعينك الله يا علي بهاي المصيبه...هذا أول ملتقه و جلسه رهيبه

هذا أول مأتم يصير بقبر...فاطميات و يلطمن عالصدر

و إلتقن سوية...جلسه فاطمية

وحده مكسورة ضلع ماتت جتيله...وحدة مكسورة قلب ماتت عليله

حيدر بكسرين يتعذب دليله...يستمع شكواهن و دمعه يسيله

و الله لو زينب تجيهن تكتمل...و انطبع بجفوفها سوط و حبل

تحضر السبية...جلسه فاطمية

الزجية ضربت اليمنه اعله يسره...بالله عالعباس واسيني يحره

جاوبت أم البنين و بيها حسره...ابجي لبني الداست الخيل اعله صدره

لا تنوحين اعله ولدي الأربعه...نوحي عالجثة سليبه امقطعه

ايدج بإيديه...جلسه فاطمية

آني يالزهره بنيني علّمتهم...هم أخوه و هم خدم لبنج ردتهم

غيرة الغيره بحليبي شرّبتهم...يدفعون انحور لعصابة أختهم

لو مشت زينب يخنقون الضوه...و الله وشحده اليمر بيها الهوه

غيرة حيدرية...جلسه فاطمية

من مشوا عني صحت يمضيعيني...و انحنيت و شابت الدمعه اعله عيني

صح بنيني اعزاز بس أنسه بنيني...و آني كل همي أبو الأكبر يجيني

و الله يالزهره عمه اعيوني الدمع...لو بجيتي ابكثري تنسين الضلع

رحمتج عليه...جلسه فاطمية

آه يفاطم آه و الآه اشكبرها...بكبر صبري عله الدنيه و غدرها

اليروح إلها ابن يذبح صبرها...و آنه خمسه و زينب تون بيسرها

زينب البيها رفع راسه الخدر...تالي يالزهره يجتفها الشمر

عالهزل رزية...جلسه فاطمية