دمي عالنهر مسفوح ..... والناظر الك مشبوح

راية وجود تبكة شهود .... ياموعود يا موعود

على جرف النهر مرمي واحس بيه الأجل يحدي

أنه بالحال واتذكر كلام المصطفى جدي

يجي مصلح يصفيهه ويطالبهه بقتل ولدي

وانه ابن النبي الهادي انه العباس يالمهدي

ابث هموم يالمحجوب ........ كل موقف يشب كلوب

انه المعقود ........ وبيك ايعود

يا موعود ........ يا موعود

بالطف من نصبت خيام واجهنه لهيب الحر

بدت نار العطش تسري كلوب اطفال والخدر

مواقف صعبة يالمهدي على يا موقف اتصبر

حرب واطفال عطشانه لهيب الصيف واهل الشر

اطفالي تهل ادموع ...... والماي العذب ممنوع

نهر مسدود ... تحرسة جنود

يا موعود ........ يا موعود

حملت الجود للشاطي علية الجيش يتجمع

شلون الجيش يرهبني وابوية المرتضى الأنزع

اجندل زمرة عل يمنة على يساري حشد يطلع

يمهدي وما يصدني الجيش لو ما جفي يتكطع

لو ما كطعت الجفين ... والسهم النبت بالعين

ارد اردود .... اصد حشود

يا موعود ........ يا موعود

بذلت عالشاطي مجهودي لكن تسعر الآمي

بكطع جفي وسهم عيني وعمود اللي طبر هامي

نسيت اللي جرة علية وتصد عيني على خيامي

ارد شلون وارويهه وانا عالمشرعه دامي

اوكفت محتار يالمهدي ... بدليلي النار يالمهدي

كطيعه زنود .... اثر عامود

يا موعود ........ يا موعود

تصد عيني على خيامي ودمي عالنهر جاري

وياريت العطاشا تشوف حالي وتقبل اعذاري

نار اطفالي ما تطفة وانه ما تنطفي ناري

ألآ من تسل سيفك يمهدي وتاخذ بثاري

عيني شابحه لسيفك .... كوم انهض وخذ حيفك

علية عهود .... بذل مجهود

يا موعود ........ يا موعود