واحسيناه ... واحسيناه ... واحسيناه

في تحدي ... هاك عهدي

واحسيناه ... واحسيناه

انته منهاج الاراده ويه السنين ... وبسمك الدين انتظامه

وانته يابو اليمه شمس الخالدين ... والفرض حبك تمامه

ثوره دمك يانشيد الثائرين ... يادروس من الكرامه

وانته انته الباحشر حصني الحصين ... ياملاذي بالقيامه

صوت چفي من يدق صدري الجريح

واحسيناه ... واحسيناه ... واحسيناه

للوفاء ... خذ ندائي

واحسيناه ... واحسيناه

سيدي تتواله ازمان ودهور ... والله ماننسه مصابك

وكل جبين يعفره ترابك فخور ... ويأخذ العز من ترابك

يالبنيت المله من فيض النحور ... شيدتهه بدم خضابك

من تلوح الگبه احس دمك يفور ... يللي باب الجنه بابك

وكل كياني يصيح لو شفت الضريح

واحسيناه ... واحسيناه ... واحسيناه

بل أنادي ... من فؤادي

واحسيناه ... واحسيناه

تنصهر اجسادنه بنار وحديد ... الموت عنك مامنعنه

حروف أسمك تمشي وي دم الوريد ... والله بأسمك سمعنه

نحبك وهذا الطبع بينه ويزيد ... والله مانترك طبعنه

مصابك بكل عام يرجع من جديد ... ولانشف لأجلك دمعنه

نصيح واويلاه ياضامي وذبيح

واحسيناه ... واحسيناه ... واحسيناه

ياغريباً ... ياسليباً

واحسيناه ... واحسيناه

احنه عنك مانميل ومستحيل ... سيدي نزل ونعوفك

سرنه وياك بدرب كلش طويل ... يبتدي بثورة طفوفك

ونبقه عالمنهج يبن حامي الدخيل ... للحشر لمن نشوفك

شما تجور عداك عنك لابديل ... وتنكتب بالدم حروفك

هاك بيعتنه بشكل واضح وصريح

واحسيناه ... واحسيناه ... واحسيناه

لانخادع ... اذ نبايع

واحسيناه ... واحسيناه

يوم طاح الاكبر ابين الصفوف ... شكبره يابو اليمه صبرك

من شفت عباس مگطوع الچفوف ... ومن اجيت ومحني ظهرك

يالوحيد ودارت عليك الالوف ... يللي درع المله صدرك

نحرك انته اللي ذبح ذيچ السيوف ... ثبت الاسلام نحرك

يالصفيت مهشم ضلوع وطريح

واحسيناه ... واحسيناه ... واحسيناه

قلبي دامي ... ياأمامي

واحسيناه ... واحسيناه

آه يمن صدرك ترضه الخيول ... آه ياشبل الزچيه

مادرت صدرك صدر طه الرسول ... مدرت خيل آل اميه

ياصرح عز وثبت ويه الاصول ... ياشهيد الغاضريه

مادروا يحسين نورك مايزول ... لموعد الطلعه البهيه

وبيرغ الثارات عالي ومايطيح

واحسيناه ... واحسيناه ... واحسيناه

خذ شعاري ... بل قراري

واحسيناه ... واحسيناه