ودعتهم .. .. قلب يدفن حبه بيده

ودعتهم .. هاي مشكلتي الوحيده

ودعتهم

_______

ابد ماچان ابخيالي ادفن بديه...شمس كل يوم الصبح تطلع عليه

اشلون يرجعلي اليروح ابغير جيه...والله حيرة ادفن وجه ماليني ضيه

والله حيرة .. شلون ارد للدار وحدي

والله حيرة .. اترك اغله احباب عندي

والله حيرة ..واليروح اشلون اعيده

ودعتهم

_______

گمت امر بترابهم واشتم عطرهم...واسأل اتراب الگبر يومية عنهم

بعده لون الورد مرسوم ابوجهم...لوترابك ياگبر غير شكلهم

رد عليه .. ياعلي التنشدني عنهه

رد عليه .. شرفت گاعي ابدنهه

رد عليه ..روح اخذ ثار الشهيده

ودعتهم

______

باب خيبر وحدي جريته وقلعته...صار نصين وجسد مرحب شطرته

هِسه نص رغيف يابس ماكسرته...طاح سيفي وردت ارفعه مارفعته

لاتگلي العين لوفگدت بصرهه

لاتگلي .. ايعود بالهين نظرهه

لاتگلي ..ترجع ايامك سعيده

ودعتهم

______

همه العيون الأشوف الدنيه بيهه...والچفوف الينتچي الطايح عليهه

اشلون تعبر روحي الاحزان التجيهه...هيه جثة ابنص بحر ميتات اديهه

اني منهم .. گمت ماشوف اليجيني

اني منهم .. شوف ماشبعانه عيني

اني منهم ..للحزن كل يوم أزيده

ودعتهم

______

انا ابوالحسنين هذا الماكو مثلي...بالحروب ايصير مثل الأسد شكلي

ودعت فاطم وابوها ومال حملي...الدمعة خافت تنزل وگلتلهه نزلي

من اجلهم .. نزلت ادموعي اعله خدي

من اجلهم .. رجعت سيفي اعله غمدي

من اجلهم ..ماخذت حق الأريده

ودعتهم

_____

وحدي وايام الحزن كلهن لفني...والمصايب للمصايب سلمني

بعد مامحتاج تسأل غيري عني...ياعطر شايل حزن بي ريحة مني

حالة صعبة .. يا منام ايمر عليه

حالة صعبة .. واني دافنهم بديه

حالة صعبة ..وجوهم صارت بعيده

ودعتهم

______

حته ماگالولي راح انروح عنك...أجمل ايام العمر ناخذهه منك

اتحضر الهن گالوا ايام اليجنك...وحدك ومحني الظهر واستفردنك

فارگوني .. وابتدت بيه المواجع

فارگوني .. اني الاول صرت رابع

فارگوني ..انهتك ستر العقيده

ودعتهم

______