أدور عالترب وينك يمطروح...من بعدك عليله و فاجده الروح

طايح بالشمس و الشمس تاذيك...طايح وين أجي يمك و أحاجيك

أريد أعتب اعتابي خويه و أنعيك...أنا عمري قضه و ما بطل النوح

ياللي فارقتني و قلبي وياك...تره افراقك صعب ما أقدر أنساك

خذاك الدهر مني الوين ودّاك...و كل صبري انفنه و الصبر ممدوح

آه امن الدهر ما يصفه وياي...و كل يوم بسهم صوبني بحشاي

و يا هو اللي يداويني و بعد هاي...يداوي للقلب و القلب مجروح

مجروح القلب يحسين بالهم...و همي فوق همك بيه ملتم

و بهم الغرب حيلي تهدم...و شيبني زماني و دمعي مسفوح

دقوم الغربتي و ارحم بحالي...تدريني الغريبه و ما لي والي

و ياللي سهرتني بهالليالي...دهاني الليل ما وجد بعد روح

سهرانه أقضّي الليل لوعات...و طر بيه الفجر و النوم هيهات

ألوج بلوعتي و أتذكر الفات...و أيام العشتها اوياك متروح

عشت وياك أيامي و سنيني...و يالظلك سقف بيتي و عريني

رحت لاوين عني و ما تجيني...و بس ذكرك جمر بالقلب مقدوح

يالذكرك شعل بالقلب نيران...يا قلب الأصبره اعليك و إلسان

و لو شافك طريح اتصيح عطشان...نايم بالشمس يبن أمي مذبوح

مطروح و تون بجروح قلبي...و أحوم اعليك بالميدان و أربي

أقولن وين طاح حسين ربي...و ما شوفه لجن عطره غذه ايفوح