سلام الله سلام الله سلام الله عليكِ يا زهراء

أمانه ادموعنه يمج يسر الكون خليها...اعله ضلعج ينجبر كسره

بجينه أرواحنه و كل احنه المقصرين...لو نبجي العمر ما نوفي للسطره

يا قلعة علي و يا بيرغ المرسول...يا جبد الحسن يا حسرته و جمره

يا ضلع الإمامه و محكم التنزيل...يا دمع الحسين و لوعة الكبره

إجينه ابدمعة الأيتام نترجاج...يا أم اليتامه و بسمة الفقره

اجينه و كل حوائجنه بسواد العين...و من تيار عطفج ردنه بس قطره

ننثرها بجسمنه ما نخاف النار...برد تصبح علينه النار الموجره

اجينه المجلسج ندري ثواب اهناك...لو صار الحشر و اعيونه اتنظره

حاشه اتعوفنه أم حسين بالشدات...و آنا أدري الخدمهم بالحشر قدره

يجي حيدر علي وياه هاي الناس...على درب الصراط بيمنته ايعبره

و ينادي المنادي بصوت عالي ايصيح...هله بخدام أبو السجاد و العتره

إدخلوها بسلام و هاي إلكم هاي...هدية امن الزجية الطاهرة الزهره

و انشوف المواكب مستهلها حسين...يم الكوثر و لحسين منتظره

تهوس و البيارق راية العباس...و العباس يمها ايهوس ابنصره

و نفس هاي التعازي الكحلت عاشور...عله المظلوم تبجي و تلطم و تقره