عتاب عتاب...كلمة حزن ظلت عله اشفافي

عتاب عتاب...من الأحبهم يا زمن كافي

من يروحون و يودعوني الأحبهم

و الله أشوف الدنيه مو دنيه بعدهم

وسفه هاي القاع من عندي خذتهم

ناموا بوسط التراب و ضيعتهم

عذاب عذاب...وي كل صبح يلجم كل جرح غافي

للأجل راحوا و ما ظنهم يجوني

اعزاز عندي و بالسفر بس لا نسوني

لحظة وحدة اعله الهجر ما وعودوني

سكنوا اتراب البقيع و عذبوني

وداع وداع...ليش الحبيب ابروح و يجافي

شوفة الخلان صارت مستحيله

و الرحل يا ناس عذّبني برحيله

يا زمن وين الخليل الأشتكي له

و اليساعدني عله اهمومي الثجيلة

عجيب عجيب...وين الأشوفه ابشدتي يوافي

وين راح الغالي و أبعد يا زماني

أرد أذكره ابدمعتي و لهفة حناني

أرد أقله افراق خلاني عماني

و الوداع ابساحل اجروحك رماني

تشوف تشوف...حنيت الك و الصوتك الدافي

فارقتني و الله شاهد ما نسيتك

و جيت المجروح و المحتار اجيتك

يالنمت جوه التراب اتعذريتك

لمن اشتاقيت لك بس ما لقيتك

أريد أريد...بموادعك أمشي الدرب حافي

تعب اعيوني السهر لمن عفتني

شفتك بآخر نفس ما كلمتني

اتزاعلن روح و قلب من فارقتني

عاشرت قبرك حبيبي و ضيعتني

خذاك خذاك...جف القدر و اختلفت أوصافي

ودعتني و بالقلب خليت جمره

يا هو اليصدق علي ايفارق الزهره

يالمشيت و حتما بقيت ذكره

حيدر اخلافك بعد ما يسوه عمره

مشيت مشيت...حمل المصايب ظل عله اجتافي