فتية علي لجنازتك بالدمعة شيعوها...و السمه شالوها ابنعش بالقاع دفنوها

مسموم...مظلوم

اعيون السموات السبع فاضت دمه اشبيها...عرش الله لجلك يالحسن دمعاته يجريها

لجلك نزل يم زينب و رايد يعزيها...جرح البعد كبر الألم و الخوة ذبحوها

روح العقيلة اعله الأخو حضنت مصيبتها...و اختنقت أنفاس الهوه بتسبيح حسرتها

تبجي قناديل السمه و النور دمعتها...سموا كريم أهل العبه و الدنيه يتموها

شمل الثرية اتشتت و خافت ضوه النجمه...مخنوق صوت أم الحزن صاحت يبو اليمه

ريض بتشييع الحسن خليني أشتمه...صابوها روحي ابغيبته بالحسرة صابوها

يالغافية اعيونك بجت دم عيني لمصابك...ترضاها تمشي و آنا ظل مجروحه بغيابك

وياك أروحن للقبر و أندفن بترابك...يا شمعة الله بمنزلي و الشمعة طّفوها

خل تغفه عينك أمّن اعيالك أباريها...رمله أمانة بذمتي بعيوني أخليها

و اجفوف جاسم يالحسن بجفوفي أحنيها...ما خلّي رمله ابكربله الوادم يسلبوها

يا ثالث اجروحي يظل جرحك سبب همي...سم جبدك ابجبدي سره و اختلط وي دمي

بيك انطبر راس الوصي و انكسر ضلع أمي...روحي بغيابك يالحسن هالليلة هضموها