يا خالق...يا رازق

ثبّت لي قدم صدق اويه أنصار الغريب حسين

أتمنه...بالجنه

ويه عابس أصير و داري يم دار الغريب حسين

و الضحه ابفيض ادماه...يا رب تحشرني اوياه

سبحانه من أوحى لآدم الأسماء

خله اللي ويه حسين ماتوا أحياء

يا ما دعيتك من زرت عاشوراء

يا ربي اتبيض وجهي عند الزهراء

ابهالدعوه...و الرجوه

ويه الضحوا ابدمهم أريد الزهره تشملني

أتوسل...و اتأمل

هيه القبلت الحر الرياحي و ظني تقبلني

الحر العايف دنياه...يا رب تحشرني اوياه

ما أقول أنا و أنصار بفذ مقدار

و لا وصّلت يحسين عشر المعشار

او لا قلنه عابس لجن يبن الكرار

يا ريت خادم أنحسب للأنصار

آنا أدري...يا ذخري

اللي يحب حجر ربك يحشره اويه الحجر باجر

و بقلبي..كل حبي

لهلال و زهير و مسلم و هاني و ابن ظاهر

كلمن ضحه المولاه...يا رب تحشرني اوياه

يا موسه دهرك بالبشر جم فرعون

جم ساحر اويه ايزيد ضدك يسعون

أنصار عند غيرك تفوق المليون

لاجن و لا وصلوا ربع عبدك جون

هالخادم...عالوادم

أصبح سيد و دمه النزف بيه ريحة العنبر

من قده...و بخده

حط خده الحسين و جثته يم جثة علي الأكبر

و الحصّل هذا الجاه...يا رب تحشرني اوياه

و هذا حبيب النال فوز الدارين

خي عون ابن ظاهر جمعهن الأثنين

اينول الشهاده ابدنيته و قرة عين

عقب الممات ايصير بواب حسين

أصحابه...يم بابه

واجب من نسلم عالحسين انسلم اعليهم

و من نقره...هالفقره

يعني الله بسماءه السابعه هوه اليحيهم

و اللي الصادق حيّاه...يا رب تحشرني اوياه

شيخ الأنصار و يا كلام اليحويه

بعمر الكهول او واهس العاشق بيه

عنه اشنقول ابيوم نذكر طاريه

يكفيه زينب بت علي امسلمه اعليه

خل نسأل...لو يحصل

ترجع يا حبيب الدنيتك منها اشتريد أكثر

رد نسمع...لو أرجع

بس رايد أكون ابخدمته و بمجلسه أحضر

و الهذا أصبح منواه...يا رب تحشرني اوياه

اتمنه حبيب اتعود بيه أيامه

يخدم حسين اردود وي خدامه

يوقف ينظم جوقة اللطامه

و بعاشر امحرم يشيل القامه

لو طبّر...يتذكر

صرخة حيدر ابموكب مشق عد خيمة الحره

و فكرتنه...ابطبرتنه

انكرر موقف أصحابه و دمانه اتجدد الذكره

و الطّبر يا الله...يا رب تحشرني اوياه

صح آنا ما ضحيت إله ابفيض ادماي

بس آنا بعدي بنصرتك يا مولاي

المشايه سيفي و رمحي و دمعة عيناي

و درع الحماية منبرك صوت ابجاي

أنصارك...زوارك

كل خطوة جدم محسوبه طعنه ابخاصرة خصمك

مشّايه...بالرايه

و سبعينك ملايين أصبحت و الكل قصد يمك

كل مشّاي ابمسراه...يا رب تحشرني اوياه