أنصارك اوياك انصيح هيهات منا الذله

أسمع حبيب بإسم الأنصار يصيح

و يخاطب حسين و دمع عينه يسيح

قبل الهواشم بالحرب كلنه انطيح

يحسين إلكم مرخوص دم النحر ما يغله

يحسين أنصارك و عالصعبه انفوت

هيهات للذله ارتفع عالي الصوت

لا ما نعوفك لو ألف مره انموت

وحدك تظل خِله اتصير و احنه النسد الخِله

سيف آل اميه اعليك بالطف مسلول

دونك عمرنه العمر شيريد ايطول

بالحشر لو سائلنه جدك شنقول

خفنه و تجنبنه الموت لو ما وفينه انقله

لا و الله لو نصبح وذر فوق القاع

ما نجفي عنك و العهد ما ينباع

أرخصنه و انت اتشوف بالحومه اسباع

نقلب الجيش اعله الجيش و البيه ميله انعدله

ما دام نشتم الهوه و بينه الروح

ههيات منك شعره هالجيش ايلوح

واحد بعد واحد عله الموت انروح

من قبل دمك يحسين دم الوريد انبذله

بينه الفرح موجود ما بينه الخوف

نفني لك الفرسان و بعينك شوف

فرصتنه هاي و ما نخليها اتطوف

لازم هدفنه المرسوم نقصد اله و نوصل له

هاليوم يتميز طريق الرحمان

عن منهج الباطل و درب الشيطان

هم يمثلون الظلم و الطغيان

و انت يعدل القرآن نهج العداله اتمثله