يبويه طفله تدروني...يبويه وحدي عفتوني
الدمع يجري...خلص صبري
يبويه وحدي عفتوني
عفتوني عليله و الفكر محتار
شديتوا الضعن و الحادي بيكم سار
من بعدك صفت مظلمه ووحشه الدار
ظليت أنتظر و القلب يسعر نار
عيني إعله الدرب مشبوحه ليل إنهار
من عدكم يبويه ما لفت أخبار
عليله و القلب ذايب...عليله و أحمل إمصايب
إندهش فكري...خلص صبري
يبويه وحدي عفتوني
عفتوني عليله و إنقطع ظني
إتحملت المصايب من زغر سني
لفتني النايبه و لو ناشدت عني
أون ون الحمامه و ما بطل وني
يسباح القلب فرقاك دوهني
أظن حته الصخر مل و جزع مني
أنوحن و إنهدم حيلي...أنوحن و إسهرت ليلي
إبهضم دهري...خلص صبري
يبويه وحدي عفتوني
يبويه هالمحن ما مرت ببالي
أنوحن و أنظر إمجان الأهل خالي
الدهر سدد إسهامه و صاب دلالي
قطع هرش القلب و إنقطعت آمالي
هدم حيلي زماني و إختلف حالي
ليل إنهار رسمك عايش إقبالي
خيالك ظل يباريني...خيالك عايش إبعيني
إفقدت عمري...خلص صبري
يبويه وحدي عفتوني
العمر هذا العمر لو ناشدت عنه
العمر ماي و تبده و أيست منه
عيني إعله الدرب يا بويه و أتمنه
طارشكم يجي و يوصل و يتعنه
طارش ما لفه و خاب الفكر ظنه
بقيت أنحب و اجر ونه بأثر ونه
أناطر و أحسب أيامي...أناطر و القلب دامي
إستعر جمري...خلص صبري
يبويه وحدي عفتوني
أعد الليل و إنجومه و دليلي صاح
أصدق يخلص الليل و يجي المصباح
أصدق ترجع و يرجع زماني الراح
أصدق يعتمر بيتي العليَّ طاح
حياتي من عقب عينك دمع و إنياح
يا جرح الأشده و قلبي كله إجراح
أكابر و أمسح إدموعي...أكابر و ألزم إضلوعي
إنحنه ظهري...خلص صبري
يبويه وحدي عفتوني
إنقطع حبل الوصل ما بينك و بيني
من يوم الرحت لليوم تدريني
محتاره و تشوبح عالدرب عيني
و أتنطر بشارة خير تلفيني
عقب عين الأهل منهو اليداويني
أبد ما حسبت وحدي تخليني
أخبرك صوبت روحي...أخبرك ما بطل نوحي
اختلف أمري...خلص صبري
يبويه وحدي عفتونييبويه طفله تدروني
ديوان السادة
57
سطرًا