بعده بقلبي جرحك ذاك

لو أنساهم ما أنساك

أسأل وينك

أسولف جرحي و عليه الدمع شاهد

أنا الربيت أربع من أجل واحد

يمه يحسين الجرح بالرجعه متواعد

أكابر بالصبر بس دنيتي اتعاند

لجلك اولادي الربيت

يفدونك بالدم وصّيت

و من الطف ترجع حسيت

اتعيش اسنينك

خلصت الليالي امساهر و دعوه

و كل لحظه أحس قلبي انجرح توه

تعبني انتظارك بس قلت فدوه

شنو معنه الدمع لو ما نزل قوه

كل لحظه الما يبجي افراق

ما صدق قلبه المشتاق

و آنا العمري جبت أشواق

بيني و بينك

أعيش الرجعتك ما بين لن و لم

و أتاني النومه حته شوفتك أحلم

أطشر جرحي فرحه ما ردت ينلم

و الرجّع جرح فرقاك ابن حذلم

آنا و قلبي و صوت الآه

ما صدقنه اللي شفناه

يا بن حذلم لا تعناه

كف اونينك

سمعته و ما رهم عالعين تصويره

راس حسين من ديره و يطب ديره

فوق الشاطي قلي ماتت الغيره

و آنا بحالي هذا احتارت الحيره

بين أرجع للدار و بين

اوقف و أنتظرك يحسين

دمعاتي التجري من العين

تجري ابعينك

نعم اولادي فدوه الكل أهل بيتك

نعم بس انت يا بو اليمه حبّيتك

نعم كل العمر يحسين تانيتك

إذا ما أموت أنا ما أقول وفيتك

لو ترجع ذيج الأيام

و انعيش ابلا هم و آلالام

و اعيالك ما أقول أيتام

بين ايدينك