عيني . . عيني عله أيتامي ، أيدي . . أيدي على اسهامي

و انقطعت انفاسي . . لكن بقه احساسي

أنظر لأهل بيتي وأشوف أحبابي ، وشلون ذبّلهم مرار اغيابي

بين النعت والدمعت لمصابي ، وابين الأيتام ال تون اببابي

صح غمضت روحي . . بس صاحية اجروحي

باقي .. يمهم نحر دامي

الموت بالطف اختلف موضوعه ، اصوات نيران العطش مسموعه

ذاك طفل يبجي دمع بيه لوعه ، يا اسهامي طلعن ارد انشف ادموعه

لجن اجت زينب . . يمه بقلب يلهب

نادت .. آنا إلكم أيامي

طفلة تحت روج الحوافر راحت ، صفت تراجي مو دمع من ناحت

مدت ايديها للهوا وما لاحت ، الشمس أثرت في المدار وطاحت

كل دمعة تبجيها . . آنا انذبح بيها

صارت .. واحد من آلالامي

بالطف رخص للموت كل الغالي ، يشهد مهد عبدالله ذاك الخالي

اتنافسوا ع الموت حته اطفالي ، واحد يقل للثاني آنا التالي

مذبوح شافوني . . وبلهفة حضنوني

وأنا .. شوقي نهر ضامي

الهوا مرني وبالخيم وصيته ، قلت له لأن بيهن ورد ضميته

قلي المخيم يحترق خليته ، و آنا اعتذر مولاي ما طفيته

حتى الهوا العالي . . هم خيّب آمالي

وينه .. يفزع على اخيامي