صوت البشاير صاح ...هالليله هنانه

و رضوان للأفراح... مفتوحه بيبانه

هالليله ما أحلاه...مولد رسول الله

و رضوان للأفراح ...مفتوحه بيبانه

يا شيعة الله ابشري هالليله يا محلاها

و الله من وجه النبي وجه أرض و سمه ضواها

هذا الحبيب المصطفه هذا محمد طاها

و هاي العيون ابمولده اشموع الوفه اعلقناها

و هذا حبيب الله ... هذا أبو الزهره

فاز الذي والاه ...و اللي واله للعتره

بعيونه ارسمناه...مولد رسول الله

و رضوان للأفراح ...مفتوحه بيبانه

ميهمنه لو أهل الفتن بمحبته تهمونه

ايقولون منحب النبي خليهم ايشوفونه

لحسين حب امن النبي ما يختلف مضمونه

و أرواحنه للمصطفه نفديها خل يسمعونه

شيعة علي متعوف ... حب النبي و آاله

و الضدنه خل يشوف ... فرحتنه بهلاله

بنبضاتنه اعزفناه...مولد رسول الله

و رضوان للأفراح ...مفتوحه بيبانه

بدر الرساله ابطلعته كحلنه نور أحكامه

و ليل المظالم و الجهل خاف و شبك أصنامه

عصر الرساله ابجيته للسمه رافع هامه

و بكل قلب جف الفرح علّق الليله اوسامه

و عصر الجهاله راح ... ابهالمولد و دوره

و انتشرت الأفراح ... من انتشر نوره

الليله الصنم لهّاه ...مولد رسول الله

و رضوان للأفراح ...مفتوحه بيبانه