شيعه ...يا علي... شيعه

تمت البيعه... بسمك اليوم

من وفاة الهادي نرفع بالدمع صوت الوفه

نقسم ابعين الزجيه بالضلوع النازفه

احنه شيعه و ما نعوفك يا وصي المصطفه

بالمصاعب... و المصايب احنه ويّاك

عينك... خل تقر... عينك

احنه بيمينك... صارم ايدوم

الليله من بين النوايح و المدامع و القهر

صحنه انت الأول انت و يشهد ابهاي الدهر

و النبي قال إلنه حيدر بعدي هو خير البشر

تبقه غالي ...و ما نبالي... من تبعناك

والي ...يا علي ...والي

منزلك عالي... و انت مظلوم

ندري عافوك بمصابك يا علي و دمعك هِمه

حاير اتجهز محمد لو تواسي فاطمه

الليله قصدناك انواسي يا حامي الحمه

بالمدامع و المواجع احنه جيناك

حيدر ...صحنه ...يا حيدر

يا بطل خيبر... همنه مقسوم

إي و حق رب البريه و الرسول المؤتمن

لو ترد الدنيه بينه نرجع الذاك الزمن

جان نوقف درع كلنه إقبال باب أم الحسن

و بدمانه... يا رجانه... احنه نفداك

اعلينه ...اشهد... اعلينه

لك يا والينه... نرخص ادموم

تجتمع هالدنيه كلها بالمصايب نبتلي

ننذبح لكن دمانه اتبايعك أول ولي

نبقه شيعه و نبقه نهتف لا فتى إلا علي

للقيامه... ابلا ندامه ...نمشي مسراك

طه... يا نفس... طه

الأمه وصّاها... تتبعك دوم