عترتك يا طاها...للأبد وياها

شيعتك تدرينه...صحنه يا هادينه

اشهد انت اعلينه...اشهد انت

يالذي فوق البرايه الباري رافع شانك

الليله يالهادي بوفاتك نستمع تبيانك

اعرفنه من رايد يفوز و يحتضي برضوانك

يلزم العتره بحياته يهتدي بقرآنك

العتره واليناها ...لحظه ما عفناها

عالعهد ظلينه...صحنه يا هادينه

اشهد انت اعلينه...اشهد انت

ندري بالعتره السفينه المنجيه بدنيانه

اوياها دوم احنه ابعمرنه و الله دوم اويانه

الناس هضمتنه اعله حبها و الدهر عادانه

شافوا العتره شرفنه و أغله من ادمانه

بالدمه نفديها...ما بخلنه اعليها

عالوفه اتربينه ...صحنه يا هادينه

اشهد انت اعلينه...اشهد انت

يا نبينه اللي يحبه الله رافع قدره

ما يفرق بينك انت و بين أشرف عتره

و الذي اينافق نعرفه و الله فاضح أمره

نكشفه لمن يصلي بالصلاة البتره

اتراوغ و مكشوفه...هالبشر معروفه

و احنه يا والينه...صحنه يا هادينه

اشهد انت اعلينه...اشهد انت

فاضل الطينه و عشقنه جاي من الفطره

الدنيه ما تسوه ابنظرنه ابلايه حب العتره

كلمن ايعاديها احنه نرفضه و نتبره

الليله نعلنها البراءه من عدو الزهره

صرخه و ارفعناها...نلعن العاداها

و الله يعلم بينه ...صحنه يا هادينه

اشهد انت اعلينه...اشهد انت

مثلما نبجي اعله فقدك بالدمع و الونه

امصاب أهل بيتك يطه كل وكت يفجعنه

امحبة أهل البيت دينه و احنه بيه آمنه

و اللي ينكر هالموده ما يشوف الجنه

بالحشر تلقانه...يالنبي و ترعانه

ما نشك تحمينه...صحنه يا هادينه

اشهد انت اعلينه...اشهد انت