نخفيها يالمختار - لو نكشف الأسرار

من نحچي واقعنه - واجبنه يدفعنه

لو نكشف الأسرار

محمد يارسول الرحمة والمعروف

ثمن باهض يكلفنه الحچي المكشوف

لأن تدري ابوضعنه بالخطر محفوف

إذا نسكت فرض من الفروض انعوف

ممكن يسمع اويتكلم المكفوف

لكن ما يشخِّص إلا مِّن ايشوف

عند العدل فرقين - بين الأذن والعين

لو شفنه واسمعنه - واجبنه يدفعنه

لو نكشف الأسرار

يامن للمكارم والعدل مرسول

عنك چم حديث امدوّن ومنقول

بين اللي ضعيف السند والمقبول

نعرضه اعلى الكتاب وناخد المعقول

لأن باچر ورانه سائل ومسؤول

إذا نحرّف كلامك بالحشر شنگول

من ناخد التأويل - من مهبط التنزيل

بالدنيه ما ضعنه - واجبنه يدفعنه

لو نكشف الأسرار

إذا رب الجلالة اتبنّه تربيتك

قبل آدم رفع فوق العرش صيتك

من اسم العظيم اختار تسميتك

واختارك نبي ويعلم ابماهيتك

إذن يكفر إلشك بأمر توصيتك

وصيت ابكتاب الله وأهل بيتك

عنهم نزل وصّيت - لو نتبع أهل البيت

واحنه إلتشيّعنه - واجبنه يدفعنه

لو نكشف الأسرار

وصيّك يارسول الله إلشلت يمناه

وصحت مولا علي إلكلمن چنت مولاه

وياربي انصره وانصر إلوالاه

وعادي من يبغضه ابغيبتي وعاداه

علي وغيره لواء الحمد من علّاه

صرح الدين ماچان ارتفع لولاه

وإلتبغض الكرار - باچر وعدها النار

خليها تسمعنه - واجبنه يدفعنه

لونكشف الأسرار

علي إلتعرف صفاته وانتَ بي أدره

چتّفته ابوصيتك وابتله ابصبره

هاي أول ضحيه فاطمة الزهره

اجت ليك ابضلع ما ينجبر كسره

اخبرك بالجرى يالهادي بالعتره

بين امصاب چبده وانگطع نحره

راحت سبايه اعيال - ظلّت يتامه اطفال

هالحالة تفجعنه - واجبنه يدفعنه

لو نكشف الأسرار

علي إلباع النفس والدين ماباعه

إمام ابنص إلهي ومؤمن الطاعه

مثل مركب الدين وحيدر اشراعه

وإليبغض علي مشكوك مرضاعه

جزء من صبره لمّن ورثت اتباعه

كل يوم وعليها قامت الساعه

نعرض صور وأفلام - عن زمرة الإجرام

مايكفي مدمعنه - واجبنه يدفعنه

لو نكشف الأسرار

الأمه يامحمد طاحت ابحيره

سر حيّر فكرها اتريد تفسيره

إليجهر بالشهادة وتابع السيره

هذا ابيا شريعه ايجوز تكفيره

صح من گال واصبح حكمه تعبيره

مايعرق جبينه إلبايع الغيره

وإلعبدت الأوثان - ماعدها كل ايمان

منها تلوّعنه - واجبنه يدفعنه

لو نكشف الأسرار