زينب إختك غريبه ووحيده...بإنتظارك وجودك تريده

طول صبرها...عندك خبرها

زينب إختك الجيتك جانت تحسب الأيام

يا يوم التنور البيت بوجودك يبدر التام

و تجبر كسر ضلع أمها و جرح هامة علي يلتام

ما حسبت بغيابك تطيح إبولية الظلام

تشتكي لك يكافل ضعنها ...ما رحمها بغيابك زمنها

ظالم دهرها...و عندك خبرها

خبّرها الوصي عنك عن فضلك و معروفك

و ظلت تنتظر لليوم يا نعم الإخو إتشوفك

إختك قابلت مهدك و كل صبح و مسه إتطوفك

و جانت تجدب الحسره من إتقبل إجفوفك

هالجفوف السخيه الكريمه...تنقطع يا وسافه هضيمه

و يخسف قمرها...عندك خبرها

زينب إلك يا عباس جانت أختك و أمك

و أبوها إشما نشد عنها يلقه أم الحزن يمك

و بإسمك جانت إتلولي و حبها إختلط وي دمك

و بشمة قلب ملهوف يا عطر الوفه إتشمك

إنت تدري إبقلبها و سؤاله...يمته تكبر يراعي الكفاله

كافل خدرها...عندك خبرها

و الطف كربله وياك من طلعت يكافلها

و بيدك ركبت زينب يبو الغيره إعله محملها

و طول الدرب يا عباس جانت رايتك ظلها

و تزعل عالهوه لو جان من إيهب يزعلها

عالي جان الخدر من جبتها...وشجره إعليها لمن عفتها

حارت بأمرها...عندك خبرها

أبدي إمنين و أشرح لك قصة ألم قصتها

تركت أثر يا عباس فوق الوجن دمعتها

رجعها الوكت للشام و ذكرها بمصايبها

وحيده إبديرة الغربه ووافتها منيتها

من قرب يا بو فاضل أجلها...من توله غسلها و دفنها

محد حضرها...عندك خبرها