فدوه لحسين... أقدم روحي و أبو السجاد طبيب إجروحي

هذا حبنه و من يقول إنبدله هذا شوق إقلوبنه المتأمله

للممات إتعيش بينه كربله و الضوه العين... أقدم روحي

خل تلوم الناس بينه إشما تلوم عدنه حب حسين بس هو اليدوم

كل مسيه أرواحنه إبقبره تحوم إبشوق السنين... أقدم روحي

آنه أحب حسين حد قطع النحر و أصرخ العباس محبوبي القمر

إدموعي ثوره و ضحكة الشامت قهر أنطي جفين ... أقدم روحي

عندي صوت حسين ثوره إعله الطغاة مات ضامي و ما شرب ماي الفراة

حسين درب المغفره و باب النجاة و نذر للدين ... أقدم روحي

عند أبو السجاد غفران الذنوب حسين باب الرحمه للرايد يتوب

آنا من يوم المهد بحسين أذوب بحب مجانين... أقدم روحي

صوت من جوف المناحر يعتلي آنا عاشق و العشق واضح جلي

و آنا ناذر عمري لحسين و علي و بإفتخارين ... أقدم روحي

آنا عندي حسين ثورات الخلود و بمحرم كسّر إبدمه القيود

من غرامه إتعلمت معنه الوجود و بغرامين... أقدم روحي