أيسينه ...ما تجينه ...راحت الزهره إمن إيدينه

للأبد مترد علينه ... أيسينه ...ما تجينه

إمسافره يمه و أقولن غيبتج ما ظن تطول

و أقصد أنتظرج ييمه جاوبيني يالبتول

إعيوني مشبوحه إعله دربج قلبي ينشدني شقول

شو عتبنه ما سمعتي هذا منج مو قبول

شو بطيتي ...ما إجيتي

عودي يمه علينه ...و بحنانج عوضينه

يمه عن عيني بعدتي و ما يفيد الإنتظار

و أيست منج ييمه لاجن إببالي سؤال حار

إشصبرج يمه عليها شو جفيتي شلي الصار

كل وكت قلبج علينه همج إبليل و نهار

إتيتيمينه ...إتضيعينه

وين حبج يا حنينه ...إشبدلج يمه علينه

إنجان يا زهره نسيتي لا و حقج ما نسيت

إنجان يا زهره سليتي لا و حقج ما سليت

لو سمعت إسمج يزهره هلن إعيوني و بجيت

لوعتج يمه إبقلبي الفرقتج يمه إنجويت

وين أمي ...إتشيل همي

إبقلبي شخصج وسديته ...ما سليته و ما نسيته

يمه أم جلمه جبيره بيها كل معنه الحنان

يا ما تعبت يا ما ربّت الباري قال إلها الجنان

و تضحيه معنه الأمومه كل وكت و بكل زمان

لو قلت يمه أحِسّن بالموده و بالأمان

يمه يمه ...أحله نغمه

فاطمه يمه تعالي ...تفقديني و شوفي حالي

فاطمه الباري يودها و الموده أجر الرسول

يغضب الباري الغضبها الباري سماها البتول

جهلت الوادم قدرها و الدمع منها سيول

مو عله الدنيه ألمها عالرساله و عالذحول

بعد أبوها ...روعوها

راحت الزهره بألمها ...للنبي تشكي هضمها