و أظل لتبره من عدهم إذا عافوا أبو اليمه

نذر يا فاطمه عندي و عليَّ دين

لخلي إعيالي توقف تخدم إبكل حين

و أعلمهم شنو الخدمه و محبة حسين

اليخدم حسين عنه ما يدير العين

أبو اليمه وهب إلنه حياته من جره دمه

أبو اليمه الذي بإسمه تسمينه

يريد إلنه الكرامه من عقب عينه

وقف يوم الطفوف و قدم إبنينه

و ضحه إبكل أهل بيته و نساوينه

رضيعه قدمه إلنه لجن وين الذي إيفهمه

لخلي من بنيني واحد إعله الجاي

وواحد يوقف ببابه يصب الماي

وواحد يصرخ إبلطمه حسين مولاي

و بنتي تذكر إسكينه إبحزن وياي

تنادي ويه أطفاله يزينب عمه يا عمه

أنا الما همني خل تحجي جميع الناس

تسودن هو و إعياله إبعشق عباس

انا ابهالخدمه باجر ما أهبط الراس

إلي بيها فخر بالآخره و نوماس

أنا ما عوف أخو زينب و أظل متحزم إبهمه

لخلي الدمعه دوم إبطارف إعيوني

و أقلهم عالبجي و الونه عينوني

إذا مليتوا مني إونيني عوفوني

و بباب المجالس أنعه خلوني

أموت إبمجلسه يا ريت و أصير إبجنته يمه

أحس كل مجلس إقبالي حرم يزهر

و أريد أبقه حمامه بالحرم أفتر

أنا أصلي الحسين و موطني المنبر

و لا أقدر أفارق دار أبو الأكبر

أنا كل ذره من جسمي بإسم حسين متوسمه