اليوم ردت فاطمة .. أمن البقيع اتنادي .. أتصيح يزينب أجيت بضلع مكسور

أسمعت منچ يعقيلة سمعي ياأمي فاطمة

مثل أمچ يالوديعة على النوح أمعلمة

جيت بدروب المدامع على أخدودي لاطمة

وين أولادي الضحايا نايمة بفيض الدمة

وين خليت الحسين .. ياكتر دليني .. نادت الحرة ييمة حسين منحور

أنا وين وهوة وين .. أمخضبة شوفيني .. نادت الحرة يحسين منحور

راحت الجسم الشفية وتنظر اليسرة ويمين

لون هذا حسين أبني أرد أناشد راسه وين

لانها من فوق الرمح تسمع جواب أنا الحسين

ذاك جسمي وهذا راسي والحسين أنا الثنين

أجت محنيه الضلع .. قعدت أقبال الجسم .. شافت بچف الحسين الصبع مبتور

يمها ونة تنسمع .. رادت النحرة تشم .. شافت بچف الحسين الصبع مبتور

ناشدت من العقيلة وين دليني النهر

وين نداه الحسين أقطعت من عندي الظهر

شلون عيني أتشاهدت من السمى يطيح القمر

عثرت بچفة الزچية وخذت بالدم الأثر

صاحت أعلى المشرعة .. فاطمة المهضومة .. وين حماي الضعينة وحامي الخدور

أتشوف جثة أموزعة .. هامتة مهشومة .. وين حماي الضعينة وحامي الخدور

ليش يعباس يبني ماشربت امن العذب

تئبى نفسك يغيور عليك ممنوع الشرب

نايم وأختك عفتها بيا ضعينة بيا درب

بالصوارم حجبتها تالي تمشي أويا الغرب

من تهاوت رأيتك .. طاحت أستار الخيم .. نار والخيل الأعادي أعليهن أتدور

وين صارت غيرتك .. أتصيح أطفال وحرم .. نار والخيل الأعادي أعليهن أتدور

تركت الشاطئ الزچية تعثر بهمها وتطيح

رأدت أتشاهد أبوها شافتة واقع طريح

مو علي الاكبر محمد هذا الموذر ذبيح

اتوجهت صوب المدينة بت رسول الله تصيح

قوم شاهد عالثرى .. جسمك أموذرينة .. دم الأكبر من مسيلة يحجب النور

هوة يدم الجرى .. منهو غمض عينة .. دم الاكبر من مسيلة يحجب النور

رأحت الجاسم ضمدها نايم أموسد السيوف

دورت عدها علامة معرس أمحني الچفوف

ياعرس بين الملاحم زفتة بين الحتوف

شاهدت طلعة جبينة بالدمى قمرة بخسوف

شلون عصرية عرس .. والدمى غاطيها .. كربلة أغيوم الدموم أتغطي أبدور

شلون مذبوحة الشمس .. هوت من عاليها .. كربلة أغيوم الدموم أتغطي أبدور