دمعة عطش و إجروح...جلمة عتاب و نوح

وين العطاشه إتروح...إلمن تدير العين

نار العطش تسري...دمع العتب يجري

وينه التكفلنه ...معقوله ما يدري

يا عمه روحي له...بالحاله قلي له

و هاج إخذي دمعتنه...خليها تحجي له

نعرف قلب عمنه ...ما يحتمل همنه

بس يعلم إبجوده...مسرع يصل يمنه

ما ظن عله الوفاي...صعبه المطالب هاي

قلي له جيب الماي...من العطش ميتين

عبدالله شيهوده...ذاب الورده خده

نار العطش قامت...هيه التهز مهده

متغيره أوصافه ...يبست ضمه إشفافه

ليش إشعجب عمه...إبهذا الوضع عافه

من إنخطف لونه...قاموا يناغونه

عمك يعبدالله...جايب لك إعيونه

دمعة طفل حساس...معناها يا عباس

آنه بأخير أنفاس...هز مهدي جف البين

صاحت رقيه آنه ...عطشانه عطشانه

خلص دمع عيني...و الغالي ما جانه

من عاين أوصافي...صاح الصبر كافي

حته آنه يا طفله ...هم يبست إشفافي

يمكن بعد لحضه ...ينهي القلب نبضه

و آنه إعله هالحاله...بالموت أريد أرضه

صبر القلب مفتوت...إرحمني صار الموت

صحت إبضعيف الصوت...ودعوني يا طيبين

سكنه إويه عمتها...مشتركه ونتها

تحجي إبعتب لاجن...خجلانه جلمتها

جاوينه اللي يوافي...واعدنه بالصافي

يدري العطش جمره...و إتفزز الغافي

إبدمعي إحترق رمشي...ما بيه حته أمشي

صبروني صبروني ...قمت أقبل إبكل شي

قلولي راح إيعود...قلولي هذا الجود

بس جلمة المفقود ...ما ريدن إبهالحين

كسر الظهر يوحي...ما تنتهي إجروحي

يا زينب و شحجي ...عباس أخذ روحي

يختي و عله إوعوده ...ودالج إزنوده

و إتلقه بعيونه ...سهم القصد جوده

قمت أشتم إجفوفه...و إدموعي مذروفه

لو بيدي يا زينب ...صدقيني ما عوفه

من ردت أجيبه إوياي...صاح الإخو الوفاي

ما أرجع إبلا ماي...و إعيالك إمتانين