يوليدي خليته إعله إيديه القلب ...و إعيوني ما بين السمه و الدرب

والده و أرفع شكوتي...يا ربي إسمع دعوتي دعوتي

يالغيرك ولد ما عندي بدنياي...و آنا أمك و أطلبك يا علي برباي

يبني الخيمتي امن البعد شفتك جاي...أثاري معتني إتريد الوداع إوياي

ودعتك و دمعي لهيب و نزل ...وياك أودع يا علي كل أمل

ناديت يبني إبلوعتي...يا ربي إسمع دعوتي دعوتي

وينك صحت يالكاشف حزن يعقوب...يالرجّعت يوسف رجع المحبوب

علي إسمه إعله شريان القلب مكتوب...وشبيدي حنان الوالده مطلوب

بين الأمل و الخوف يبني طحت ...راحت إوياك الروح لمن رحت

و إرفعت طارف خيمتي...يا ربي إسمع دعوتي دعوتي

أبوك حسين أسمع إيصيح يا ليله ...علي إبنج إبشده و قومي إدعي له

وجهت الوجه للباري أشكي له ...و بدموع الغريبه الثكله أبجي له

أقسم عليك إبشرف سيد البشر...إحفظ شباب إوليدي من الخطر

و إكشفت راسي إبشوغتي...يا ربي إسمع دعوتي دعوتي

أقول إشلون أهجع و أستقر و أرتاح...يوحيد عليك أصفق الراح إبراح

وجهك يا شبيه المصطفه مصباح...يبني إبشوفتك هم القلب ينزاح

خلفك صحت آنا أمك إمروتك...وياك إخذني يا علي الحومتك

وياك أريدن ذبحتي...يا ربي إسمع دعوتي دعوتي

قلب أمك حنين و محد إيلومه ...يبني من يروح إوياك للحومه

يالوجهك قمر و أخلاقك إنجومه...عقب عينك زماني إتخيم إغيومه

و إنت المثل نور البدر طلعتك ...تظلم الدنيه يا علي إبغيبتك

جا بعد شلي إبدنيتي...يا ربي إسمع دعوتي دعوتي

حيلي رجع ليه من إرجعت سالم...بيدك يا عزيزي راس ابن غانم

مثل جدك علي هيبة بني هاشم...تريد إتروح شفتك للحرب عازم

حيلي يالأكبر مطلبك هدّمه ...لمن طلبت الماي تشفي الضمه

أرويك ريت إبدمعتي...يا ربي إسمع دعوتي دعوتي

شفت حسين راجع من بعيد إيلوح ...جايب جثتك للخيم يا مذبوح

عند أمك و أبوك إشلون ظلت روح...من شافوك دامي إبكل كتر مجروح

و الزينب إبهالحال من شافتك...هلت نواظرها دمه عمتك

ريتك تعاين حالتي...يا ربي إسمع دعوتي دعوتي