اهلال شهر الحزن من وافانه و جم قلب ذاب بلهيب أحزانه

نحن عشاق الحسين بالدماء نفدي الحسين

صحنه صيحة امترجمه بدمع و جفن ريت لا هليت يهلال الحزن

كل كَلب من عدنه دامي وممتحن و يومك انسيل الدمع خلانه

يا هلال الحزن و الهم و القهر مثلك بكربله اتقوس جَم ظهر

و شهر نوح و هضم ما مثله شهر انسينه من هضمك هضم دنيانه

يا هلال اشما نشوفك من بعيد و ترجع اعلينه المصايب من جديد

نذكر المظلوم محزوز الوريد حين جسمه اتوسد بميدانه

يا هلال اشما نصد ليك و نشوف نذكر امصاب الجره بوادي الطفوف

و حين طاح الكُمر مكَطوع الجفوف غدرته بجنب النهر عدوانه

ما طلع يهلال نورك و اختفه و دون ما نذكر شبيه المصطفه

و حين صاح حسين عالدنيه العفه الفكَد الأكبر صب دموع أشجانه

يا هلال بشوفتك نجري الدمع و نذكر الحوفه الطفو منها الشمع

بيا ذنب جسام جسمك ينصرع و يصبح اتراب الأرض أجفانه

و بعد يهلال المصيبه اشما تهل و بيك نذكر نحر عبدالله الطفل

منحره ابسهم ابن كاهل منفصل و ما تروت جبدته الذبلانه

بالحزن هليت يهلال الألم جَم جرح خليت بكَلوب الحرم

عكَب أهلها حركَوا اعليها الخيم و الخدر يسعر جمر نيرانه