بالهمه و الإرداه ...جيت أضمن الشهاده

يا با الحسن تراني...صوت النصر دعاني...جيت أضمن الشهاده

يا حيدر إحنه الصفوه... إتعنينه مثل الإخوه... قدوتنه ميثم و الأشتر

و إسمعنه سبط الهادي... إبصوت الشهاده إينادي ...و إتحيطه بالطف هالعسكر

صوت النصر لبينه... بالهمه للطف جينه... إنريد الضماير تتحرر

هذانه عبدك نافع... يدفعني أشرف دافع... لتظن يحيدر أتغير

لمن أضحي إبدمي... أتمنه تحضر يمي ...تسمع هتافي من تحضر

يا يوم أشوف أعتابك... و أوقف حزين ببابك... و أرجع أزورك يا حيدر

حبك ملك حياتي...يالتحضر بمماتي

بإسمك صدر بياني...صوت النصر دعاني...جيت أضمن الشهاده

نافع هتف و إسمعته ...و إعله الأثر تابعته ...نفس المبادئ و المصدر

ظنوة مظاهر آنه... جيت إبنفس ولهانه... مصدرها حبك و المحور

شبلك يحيدر طعته... و إعله العهد بايعته ...عن عهدك لتظن أتأخر

حبك نهج عرفاني ...و بهالحرب خلاني ...جبهة معارك أتصدر

من أنصرع بالمصرع ...و إنت إبضريحك تسمع... هالصرخه بالدم تتفجر

يا بالحسن ما تدري ...صرت أشتريها إبعمري... شوفت ضريحك يا حيدر

أبعث إلك سلامي...تحضرني يا إمامي

و إيخاطبك لساني...صوت النصر دعاني...جيت أضمن الشهاده

موقف حبيب إتخلد ...ناصر شريعة أحمد ...ظنوة مظاهر ما يُنكر

موقف زهير الخالد ...بالطف يريد إيجاهد ...و بعزمه ثاير عالمنكر

العسكر فزع من شافه ...تتراجف السيافه...نار المعارك تتسجر

إسمعنه إبغمار الموقف ...يصرخ زهير و يهتف ...يذكر حبيبه و يتحسر

صوت و يظل متعالي ...مشتاق إلك يالغالي...روحي إعله بعدك ما تقدر

من جنتك حرموني ...برجوة أمل خلوني ...كل فكري يمك يا حيدر

يا با الحسن دمائي...تكشف إلك ولائي

و بهاتف الأماني...صوت النصر دعاني...جيت أضمن الشهاده

هالصفوه ما تتوصف...بيها الشرف يتشرف ...موقفها خالد للمحشر

بالحومه واحد واحد ...بالدم يروح إيعاهد ...إيهز الكتايب لو زمجر

جون العبد صرخاته ...تكشف سلامة ذاته ...إبسوح المعارك ما قصر

لن يهتف إتعرفوني ...هذا آنه أسود لوني...إبدم المكارم أتنور

آنه العبد للعتره ...الحيدر أوجه نظره...و بصوتي أهتف يا قسور

دنيايه نفرت عني ...حته الصبر مل مني ...مشتاق أشوفك يا حيدر

يا با الحسن عبدكم...شنهو العمر بعدكم

حبك رفع كياني...صوت النصر دعاني...جيت أضمن الشهاده

جون العبد تضحيته ...حفظت مجد شخصيته ...شانه الترفع و إتقدر

هالتضحيه المرسومه ...فارس برز للحومه ...إيهز المشاعر هالمنظر

يا با الحسن هالفارس ...راعي المراجل عابس...حملاته ما ظن تتكرر

صاح آنه صادق ظني ...حب السبط جنني...أعزل و أحارب كل مغتر

الحيدر أوجه صوتي ...متهمني ساعة موتي ...هالصيحه بالحب تتفسر

من عيني ينزف موحي...و آنا بترافت روحي ...أرسم خيالك يا حيدر

قلبي رسم مصيره ...للمعركه الأخيره

صوت العمر جفاني...صوت النصر دعاني...جيت أضمن الشهاده

شوذب يخاطب أسلم ...للحومه خل نتقدم ...و إنضحي دمنه و نتوذر

حب الوصي و نتفاده...لجله و لجل أولاوده ...إبداري المعارك تتعفر

أسلم طلع و يبارز ...أعله المراتب حارز...إبسيف المراجل يتأمر

و شوذب يصيح إبهمه ...عاشق زعيم الأمه ...سر العجايب و المظهر

إبصوتي إهتفت و أتغنه ...حبك يحيدر جنه ...إشلون أنسه حبك و أتصبر

ما عندي غفوه إبنومي ...لا صحوه تجلي إهمومي ...حيرني بعدك يا حيدر

صوت النصر تردد...يا معجزة محمد

و بصوته ما نساني...صوت النصر دعاني...جيت أضمن الشهاده