آخر الأخبار

ديوان السادة

أنصار أبو اليمه النشامه

27 سطرًا

أنصار أبو اليمه النشامه... نِعمَ الأنصار

دمهم رسم أروع علامه... إبدرب الأحرار

آيات و عبر... يرويها الدهر... تنطينه العزم لو ردنه نقراها

كل آيه درس... عن عز النفس... كل عبره يغذي الروح معناها

لو عيشت ترف ...لو موت إبشرف... بين الآخره و ما بين دنياها

ناس الآمنت... موقف أعلنت... و إختارت الجنه إتصير مثواها

أعظم مثل عن البطوله إبكل الأدوار

أهل المعرفه... أصحاب الوفه... لبست عالدروع إقلوبها الصلبه

تشهد كربله... غيره و مرجله... عله إرجاب الخيول أجدامها إمجلبه

وفاية وعد... إمسابق عالعهد... كل فارس الميدان الوفه إتغلبه

طاعة كل أمر... ما أبدت عذر ...ما قالت المهمه إبكربله صعبه

و بكل عزيمه يرتفع صوت الإيثار

إيمان و لطف... و بأعظم وصف... لهفتهم النصر حسين أبو اليمه

أحله امن الشهد ...لهفة معتقد... مثل لهفة المفطوم الصدر أمه

كلمن منحره... إبفرحه محضّره كلمن مطلبه عطر الوفه إيشمه

ياخذ رادته... و الكل غايته... موقف عن خلوده يكتب إبدمه

دار الجنان إتخيرت دار الأبرار

أنقل لك صور... عن أهل الفخر... قضت الوداع إبسمه و بفرحه

ليله امن العمر ...منتظره الفجر... بين اليحد سيفه و اليهز رمحه

للموعد أجل... و إتعيش بأمل... فجر الوعد تتنطر يطر صبحه

إشلون المطمئن ...يغمض له جفن... يا مذبوح يشتاق الوعد ذبحه

خل تكتب أقلام المجد هذا الإصرار

إبفرحة كل قلب...دخلت للحرب...و الموت إبتسم من شاف عشاقه

ترسم ملحمه ...من سيل الدمه... كل شريان بالغيره ضرع ناقه

من قسمت قسم ...و الباري الحكم ...خل تشهد الحومه إبوكت الملاقه

كل مخلص زحف... بالحومه هتف... هبت للقاء أرواح مشتاقه

تحمل مبادئ ساميه ترفض العار

شارك هذا المحتوى
9٬399مشاهدة