هالدنيه ما رحمتني...أحمل هضم خلتني

شفت المحن و ألالام...إشلون أنسه جور الأيام

أحمل هضم خلتني

ما تطفه جمرة علتي و لا تطفه نار أيامي

و كربله إتعيش ابخاطري و صارت سبب آلامي

و جم جسم شفته إعله الأرض و طايح ذبيح و دامي

و جم كوكب إقبالي إنحجب و شفته إنذبح جدامي

و شفت الجثث مسلوبه...إبدم النحر مخضوبه

إشلون أنسه دفن الأجسام...إشلون أنسه جور الأيام

أحمل هضم خلتني

شاهدت كوكب عالأرض إبدم الوريد إمعفر

و ناشدت عنه و جاوبوا و هذا إخوك الأكبر

و مهموم جيت المصرعه و نار المصايب تسعر

كني شفت جسم النبي و فوق الرمال إموذر

إبدمع الجفن غسلته...إحفر القلب و إدفنته

خابت يوسفه الأحلام...إشلون أنسه جور الأيام

أحمل هضم خلتني

و النوب بالمصرع شفت إهلال و خضيب إبدمه

إتعنيت إله إبشوغة قلب و إحنيت ضلعي يمه

طالعت لن فوق الأرض و جسام طايح جسمه

و من ردت أدفنه ناشدت و هذا الجسم شيلمه

عريس جسمه إمقطع...و الحوفه وسط المصرع

إشلون أنسه لوعة جسام...إشلون أنسه جور الأيام

أحمل هضم خلتني

و ثالث مصيبه إبكربله و خلت دليلي يلهب

شاهدت من هاشم بدر و يم الشريعه إمخضب

شاهدت بعيونه السهم و راسه إبعمود إمصوب

و ما حسبت بدر الشيم و يم النهر يتغيب

و من شفت مصرع عمي...زيد مصابي و همي

وسفه إنحجب بدر التام...إشلون أنسه جور الأيام

أحمل هضم خلتني

و رابع سهم صاب القلب و خله بدليلي جمره

و من شفت عبدالله الطفل و بالسهم قطعوا نحره

و عطشان قطعوا رقبته و حيرني بالطف أمره

و هالطفل خله ابمهجتي جم نايبه و جم حسره

إمصاب الطفل صوبني...و قطع النحر شيبني

جرح القلب ما يلتام...إشلون أنسه جور الأيام

أحمل هضم خلتني

آخر مصاب إبكربله عيني ابسهم صوبها

و من شفت بالمصرع شمس جور الدهر غيبها

إتسلبت من عقب الذبح و جف الطمع سلبها

و هالشمس غُرة والدي و فيض النحر خضبها

متغسل إبدم نحره...و بيدي دفنته إبقبره

إشلون أنسه حال الأيتام...إشلون أنسه جور الأيام

أحمل هضم خلتني