يالجرحي و جرحك ما يلتم...و إنعرفك حاضر بالمأتم...يا موعود يا موعود

هذا السجاد إيودعنه...نصرخ و العالم يسمعنه ...يا موعود يا موعود

فريضة نايباتك يا زمن حلت...توضت بالدموع إجروحنه و صلت

مصيبه إعله اليحبكم عظمة و جلت...يمهدي و كربله كل صبر ما خلت

مأسات الطف تبقه إويانه ...و إنعيش آلامه و أحزانه ...يا موعود يا موعود

يالغايب مجلسنه إتحضره ...و إحنه إوياك إنواسي الزهره ...يا موعود يا موعود

قضه نحبه حزين و يسجب العبره ...يذكر والده من إنقطع نحره

و يذكر من رجع ملوي السرج مهره ...يشوف إخيولهم تسحق على صدره

مهموم و تتجاره إدموعه...من يتذكر كسر إضلوعه...يا موعود يا موعود

يذكر زينب من سلبوها...و شمعة جسام من طفوها...يا موعود يا موعود

عرفنه كل عليل أهله يدارونه...الجميع أهله و إخوته يشبح إعيونه

عليل حسين بالغربه يتركونه...أسير إبولية الظالم يخلونه

وي زينب حاير بالعيله...سهران و ما نايم ليله ...يا موعود يا موعود

ناح اليتصارع ويه الهم...من ينظر زينب يتألم ...يا موعود يا موعود

إشحال الشاف إبوه إمقطعه أوصاله ...عمامه و كل إخوته إمذبحه إقباله

شيقول العليل الفرت إعياله...يشوف الخيل عمداً تسحق أطفاله

بين الخيل إيقوم و يعثر...و الحمل الصارم ما يقدر ...يا موعود يا موعود

أطفال الفرت يجمعها...بأحضانه يمسح مدمعها ...يا موعود يا موعود

قعد ما بين إخوته و القلب هايم ...يدير إعيونه بين الأكبر و جاسم

يقله إقعد يالأكبر لا تظل نايم ...عليل آنه و عليَّ فزعت الوادم

لا ما تخمد نار أحزانه ...شيصبره الفاقد إخوانه ...يا موعود يا موعود

ما ينسه الطف و لوعاته...مات و ما ماتت حسراته ...يا موعود يا موعود

قصد للمشرعه و إدموعه تتجاره ...مشه العمه يشوفه و يعرف أخباره

من شاهد يمينه و شاهد إيساره ...نده وين اليقوم و يطلب إبثاره