يا نهر لا تعتذر ما تستحق عتابي

إنتهه حجينه...و آنا بالمدينه

بيمن أبدي إنت تدري إبقلبي مأتم

صرعه يمك كل بنيني أبجي من دم

آني أمهم و بضماهم قلبي يعلم

جنت أظنك تمشي ليهم للمخيم

ناشدت و بيا ذنب حته الطفل حرمته

يا نهر رغم البعد صوت الطفل سمعته

أستمع ونينه...و آنا بالمدينه

عجتني و من مصابك قلبي دامي

إنت تروي إخيول أميه و إبني ضامي

جنت أحذرك إنت تسمع كل كلامي

ذنبك أكبر من عتابي و من هيامي

ما شرب منك أبد و إنت إبسهم رميته

ما شرب بآخر نفس و إنت و لا رويته

دمعتي إبجبينه ...و آنا بالمدينه

إنت تجري سكنه تعطش سهله عندك

آنا أنخه يا بو فاضل وينه وعدك

أدري كثره عالشريعه و إنت وحدك

إملي جودك و إنطي عينك و إنطي زندك

لا تظن مايك صعب راعي العلم يريده

لا تظن طبع الوفي يشرب قبل عضيده

لهفتي إعله عينه ...و آنا بالمدينه

ضامي يرجع ما يشربك و إنت أدره

ساعه مرت ما كو يمنه ما كو يسره

شفت أخيه يبجي يمه محني ظهره

و آنا أصرخ يا بو الأكبر يمه عذره

يا أخو ظهره إنكسر لمن وقع أخيه

يا أخو مثل القمر غيره ووفه و حميه

قبّلت يمينه ...و آنا بالمدينه

للمخيم شفته راجع وي دمعته

من إجاها إبلا عضيده صاحت إخته

هاي يخويه وين أخونه وحدك إنته

قلها مرمي إعله الشريعه إهناك عفته

ما يرد راعي العلم من حاولت أحمله

ما يرد ظل مستحي خاف الحرم تسأله

خوفي عالحزينه...و آنا بالمدينه

حسين أشوفه من ينظرك إنت تدري

جن يقلك قطره منك تطفي جمري

و الزجيه تبجي يمه إنت تجري

و آنا أقلها إعله الشريعه إتبده صبري

فاطمه يم الجسد لا تعتقد بعيده

فاطمه تنظر إله من إنقطع وريده

يمك إنولينه...و آنا بالمدينه

طفله فرت من عطشها و الله صعبه

تحمل الماي إعله جفها و ما تشربه

إبسرعه ركضت يم أبوها هذي عجبه

إتخلي جفها البيه بروده إعله قلبه

ما وصل بويه أعتذر ماي العذب تبده

ما وصل و آنا العطش طر مهجتي و تعده

أبجي عالحنينه ...و آنا بالمدينه