راح الدلال... يا علي

و أنده تعال... يا علي

من وصلت النجف

يا علي بحماك كل هاي البريه

و إنت حاميها يحماي الحميه

ذبحوا أولادك علي بالغاضريه

هاي إجتك للنجف زينب سبيه

إنهض العيلتك ...عالهزل نادتك

ما كو رجال... يا علي

و أنده تعال... يا علي

من وصلت النجف

عاينت طول الدرب بسما لقيتك

يا اللي ما تقبل تجي آنا إجيتك

سلبونه و شتموا أمي و نخيتك

قلت لك إنهض يا علي آنه ابحميتك

شتموا فاطمه...ها يحامي الحمه

صار السؤال... يا علي

و أنده تعال... يا علي

من وصلت النجف

إحنه آل المصطفه و قرة إعيونه

لعنةُ اللهِ على من حاربونه

باعوا الدين بدراهم و إنكرونه

عاندونه و لا يزال إيعاندونه

و اليبيع الضمير...ما يقبلك أمير

وكت الضلال... يا علي

و أنده تعال... يا علي

من وصلت النجف

بويه راس حسين هذا إيسيل دمه

و اليشيل الراس هم مسلم تسمه

هذا مو مسلم إذا ما عنده رحمه

بويه من نبجي يصير إعلينه نقمه

لا لطم لا نياح...لا دمع لا صياح

هاي العيال ... يا علي

و أنده تعال... يا علي

من وصلت النجف

بويه آني الجنت بالكوفه أميره

ليها جيت اليوم يا حيدر أسيره

أدعوا يا ربي بحق طه ووزيره

إنتقم من الذي بايع ضميره

عاليقيم العزاء...صاروا إعليه بلاء

قالوا مُحال... يا علي

و أنده تعال... يا علي

من وصلت النجف

بويه هاي الناس ما شافت خيالي

تالي ما تالي إجيت إبلايه والي

بس و حقك يالصميده الراس عالي

تبقه شيعتنه سيوف و ما تبالي

شيعتك للمماة...ما تطيع الطغاة

مثل الجبال... يا علي

و أنده تعال... يا علي

من وصلت النجف