إخذني إويه النعش يا خويه يا مظلوم ووسدني ابتراب المجتبه المسموم

عقيلة حيدر إتصيح إبقلب مجروح عقب عين الحسن يا خويه وين إنروح

نظل بين الوسافه و الدمع و النوح و علينه تجتمع عقبه غصص و إهموم

تظل وحشه و خليه عقبه دار الجود تصيح الشيمه و يصيح العطف و الزود

جف اليعطف إعله المنهضم مفقود يظل عقبه اليتيم إمن الفرح محروم

يبو اليمه دريض بالنعش يحسين يطلبون النعش زمرة اميه إبدين

ثار إحنين و ثار الخندق و صفين و ثارات الجمل خويه تريد القوم

و هذيج إوياهم إتصيح إبحقد ما مات تدفنون الحسن و بمنزلي هيهات

منه و من علي آنه شفت لوعات كون أثأر منه و من أبوه اليوم

يبو اليمه إخذني بالنعش وياه جني بالعده بالنبله تتولاه

أريد إبجسمي جسم ابن أمي أتفداه و لا من كل عضو تجري يخويه إدموم

عقب عين الحسن خويه إشكبر بلواي يريت إمصابه صوب يالعزيز إجلاي

و إبداله أموتن و اخلصت دنياي أحس إبفرقته أبقه إبهضم للدوم

أحس إبفرقته صبّح صبح عاشور و جن نحرك أشوفه إعله الترب منحور

و جني إميسره و بيه الأعادي إتدور و قلبي منكسر و إعله الأهل مالوم