يا ليل الحزن كافي خلص عمري إبدربهم

واحد من بعد واحد يودعوني الأحبهم

و اليسعر جمرها...ما ينفع صبرها

عليّ مكتوب كل أهلي يودعوني

و أشاهد كل مصايبهم يريدوني

يا هالماشين عني إوياكم إخذوني

أنا زينب أصيح و ما تسمعوني

من كسر الضلع وني بعد طبرة إبويه

ودعت الإبو و الأم و إجاني إوداع أخويه

و الكسروا ظهرها...ما ينفع صبرها

يروحي إشلون حال الفقدت ابن أمها

تصيح إهنا يخويه و ما يكلمها

هاي آني يروحي الغرقت إبهمها

أشوف حسين عني دمعته إيضمها

أسمع بالحسن ينده لجن دمعه يهله

يبن أمي الطشت شيله إجت زينب يقله

إخفيه عن نظرها...ما ينفع صبرها

هذا أول طشت شفته و دليلي إنطر

طشت ثاني شفت بيه راس أبو الأكبر

يسألوني يزينب يا مصاب أكثر

أقلهم جرح أبو اليمه يظل أكبر

يا ثاني طشت شفته يظل أصعب عليه

هذا اللي جرح قلبي عليه ماتت رقيه

و الكرهت عمرها...ما ينفع صبرها

شفت جبد الحسن من سمته جعده

و شفت حسين بالطف قطعّوا جبده

الفرق جان الحسن كل إخوته عنده

و أبو اليمه يلوج من العطش وحده

طاح من المهر شفته صحت و اركض إجيته

يا ويلي على صدره الشمر قاعد لقيته

و القطعوا نحرها...ما ينفع صبرها

إجت أبطال هاشم و النعش شالوه

و بسهام الحقد أهل الحقد صابوه

قرب جده النبي ما قبلوا يدفنوه

شهر سيفه القمر بس للأسف منعوه

سل سيفه قمر هاشم إجه يمه عضيده

سيفك هذا مو يومه اليوم الطف أريده

و الفقدت قمرها...ما ينفع صبرها

شفت كل إخوته إبموته يحضرونه

يوصيهم و هم يمه و يسمعونه

إخويه حسين محد غمض إعيونه

عاري إعله التراب و ما يوارونه

مقطوع النحر شفته انا عفته رهينه

ناديته يبو الأكبر طحت و إحنه إنسبينه

و إختك من حضرها...ما ينفع صبرها

ترك أهله أمانه الحسن عند حسين

يا ويلي و يتامه حسين راحو وين

بقوا عندي أمانه و الجرح جرحين

بعد راعي العلم إلمن أدير العين

يا ريت إنقطع نحري و لا أمشي أسيره

سلبوني و يشتموني و لا فزعت عشيره

و السلبوا خدرها...ما ينفع صبرها