لليوم هذا الحزن لليوم...مالوم قلب الوصي مالوم

و الزهره ويه حسين...تهمل دموع العين

بس المصايب شفنه من الأيام...و لو نبجي دم اعله الجره ما ننلام

طول الدهر ما فارقتنه الالام...جن الوصي حاضر الليله الضرغام

لوعات فقد الحسن لوعات...ونات يجذب علي ونات

و زينب تحن بونين...تهمل دموع العين

مشبوحه لديار النبوه الأنظار...جن الوصي حاضر علي الكرار

ينشد يعباس البطل شنهو الصار...و فاطمه إتشوفه و تهل مدمعها أعبار

ملجوم إتنادي إبضلع ملجوم ...مسجوم تجري الدمع مسجوم

يا والد السبطين...تهمل دموع العين

ونه و نياحه للحسن هالليله ...و جن فاطمه صوت الحزن تشكي له

و حيدر يبويه يبني ينادي له ...و حسين هذا الخبر هدم حيله

ناداه يالمجتبه ناداه...وياه قلب الإخو وياه

الليله مباني الدين...تهمل دموع العين

هالليله نور الحسن غاب إهلاله ...و السم مرد قلبه و صبح جتاله

هالليله العيون إبدمع هماله...و زينب عزيزة فاطمه إبيا حاله

يا حيف إتنادي إبهضم يا حيف...و الضيف منهو بعد للضيف

عين الكرم بونين...تهمل دموع العين

إسهام المصايب للحسن صابنه...مخمدن لحظه من دليله الونه

و السم قطع جبده و دليله منه...هالليله سبط النبي طبق جفنه

لاوين يالمجتبه لاوين...و الدين يبجي عليك الدين

يا خويه رايح وين...تهمل دموع العين

هالليله راح المجتبه عالي الشان...و لن صوت ونه إيصيح يبني و لهفان

أم البنين إحضرت ويه الشبان...إتواسي الزجيه و علي داحي البيبان

يا ريت عمري فده يا ريت ...حنيت لمصيبتك حنيت

متحيره بأمرين...تهمل دموع العين

لرض البقيع اليوم مشبوحه العين...حاضر علي و فاطمه وياها حسين

و زينب و أبو فاضل و إخوته الطيبين ...التشييع أبو محمد إجو متعنين

و العين هماله دم العين...و حسين يبجي و يون حسين

زينب تون صوبين ...تهمل دموع العين