متحير المظلوم ...يصرخ يخويه قوم

ظهري إنكسر... يم النهر...و إتشمتت هالقوم

حين اللي إنخسف وجه القمر بالدم

ناده إبصوت ظل يدوي إبسماء الهم

يخويه إدركني حان الموت و إتحتم

إجاه حسين شافه إبمصرعه إمخذم

شاف القمر مخسوف...مقطوعه منه إجفوف

أحنه الظهر... يم النهر...و إتشمتت هالقوم

قبلما يوصل العباس أبو اليمه

أبو فاضل سمع شخص إعتنه يمه

سهم إبعينه و إعله الثانيه دمه

يظن هذا الذي إتعنه إله خصمه

إتمهل يقله الحين...أتوادع إويه حسين

حس بالخطر... يم النهر...و إتشمتت هالقوم

القمر عباس ما يقدر يصد بالعين

ما جا يدري هذا اللي قصد له حسين

يظنه للذبح شاهر حسام البين

لن إيجاوبه حسين إبنحب و إونين

هذانه أخوك و جيت...للمصرع إتعنيت

شفتك وذر... يم النهر...و إتشمتت هالقوم

يقله حسين بعدك راح أظل وحدي

وداعك هذا يستنفذ عزم جهدي

و مو بس العساكر يا قمر ضدي

العساكر و الضمه و هم غربتي ووجدي

لو تدري يا عباس...بعدك يبو النوماس

صرت إبكدر... يم النهر...و إتشمتت هالقوم

بين إموادع العباس و حسينه

أبو فاضل غفت يا للأسف عينه

إحتار حسين لو يرجع صواوينه

إشراح إيقول جا وين القمر وينه

إبدمع الحزن مذهول...شيجاوب و شيقول

عفت القمر... يم النهر...و إتشمتت هالقوم