شاءَ الإلهُ بأنَ يراكَ قتيلا

يبن الرسول الرحمته إتعم المله

و ابن الوصي و ابن الرضيه الفاضله

يا من لبس تاج الكرامه و العله

و حزت إبصفاتك عالبريه منزله

تاج الفخر الله إعله شانك فصله

و غيرك مثل هالتاج أبد ميلوق إله

فالفخرُ رامَ إلى عُلاكَ سبيلا

شاءَ الإلهُ بأنَ يراكَ قتيلا

من رسمه بآفاق المعالي صورتك

يحسين و منسوجه إبجلاله هيبتك

شمس القداسه و الجلاله إبغرتك

و إمن الأزل بارينه وضح غايتك

و كل العوالم بالنحيب إتلقتك

من شاهدت بالدر صور من ذبحتك

مُلءَ الفضاء لما أتيتَ عويلا

شاءَ الإلهُ بأنَ يراكَ قتيلا

من مولدك ثغر الحزن بالمحنه ضج

بمصيبتك صوت الصبر بإسمك لهج

يحسين إلك لوعه تفت كل المهج

فاقت على كل نايبه يبن الحجج

و الكون إلك بنياحته و أكداره عج

قبلة حزن و الكون إلك بالدمعه حج

فالكونُ ينعى بُكرةً و أصيلا

شاءَ الإلهُ بأنَ يراكَ قتيلا

لمصيبتك بالنايحه تبجي السبع

حته العرش لجلك ينوح و منفجع

أقسم لون مو إنت ما صار الدمع

لو ما مصابك ما ضمد جرح الشرع

ضامي تروح و منحرك أصبح نبع

يالمجدك إبكل العوالم ظل يشع

مجدٌ تطاولَ بالسباسبِ طولا

شاءَ الإلهُ بأنَ يراكَ قتيلا

يحسين إلك صورة حزن ما تنوصف

تحني الجبال الراسيه لو تنكشف

يمرافق السياف إخو الرمح وولف

ياللي إبخلودك طوحت سبعين ألف

لجل القيم من جسمك إتجاره النزف

و إبنحرك إنت صافحت جف الحتف

يا منحراً بالطفِ كانَ صقيلا

شاءَ الإلهُ بأنَ يراكَ قتيلا