رغم الهجر... راح أنتظر

يالعفتوني... لو تنسوني... ما أنساكم

يا من مشيتوا إبراحله و إقطعتوا إفجوج الفله

لو عني ناشدتوا أنا الطفله العليله المعوله

إعله الدرب طالت وقفتي إيرد الطعن أتأمله

ذبلت حياتي و أصبحت مثل الورود الذابله

شال الضعن ... و آنه إبشجن

زايد روعي... تجري إدموعي... و أترجاكم

يالعفتوني... لو تنسوني... ما أنساكم

عفتوني للهم و المرض حزنه و كئيبه و خايفه

تانيت من عدكم خبر و لا طارش المنكم لفه

منكم تعودت الوفه و لا ما تعودت الجفه

لو إنتو ما إلكم مرد يهلي عله الدنيه العفه

إشيسوه العمر... ليش أنتظر

كل آمالي ... و عمري الغالي... راح إوياكم

يالعفتوني... لو تنسوني... ما أنساكم

حين الذي شفت الضعن راح بأبويه و إخوتي

بيدي إهدمت بيت الفرح و شيدت مأتم حسرتي

عبدالله و حسين و قمر هاشم و زينب عمتي

هذي صورهم شاخصه إقبالي و تجدد لوعتي

إتمر إبقهر... هاي الصور

آنه الحزنه... و يا ريت أفنه ... و لا فرقاكم

يالعفتوني... لو تنسوني... ما أنساكم

ِ

عفتوني إبليلة هضم و محد عن أحوالي سأل

إبذاك الضعن حته الطفل عبدالله وياكم رحل

ظليت أنا و علتي و اللوعه و الغم و الأجل

الليله إحفرت بيدي قبر و بيه إدفنت كل الأمل

و بهالقبر ... إدفنت الصبر

نافذ صبري ... أعلم و أدري ... ما ألقاكم

يالعفتوني... لو تنسوني... ما أنساكم

أتشكه إلمن يا هلي و الشكوه ما ظن تنسمع

مالي درب إلا النحيب و مالي أنيس إلا الدمع

إتحسبوني أنسه و أستقر و أتأقلم إبهذا الوضع

منساكم و أقسم قسم بالزهره و بكسر الضلع

قلبي يحن ... و آنا أون

قلبي إملوع... منهو اليسمع... لو ناداكم

يالعفتوني... لو تنسوني... ما أنساكم