هاي زينب يا كفيل إضعونها قوم يا عباس شوف إمتونها

امن إش وكت ما شبحت الوجهك العين إبيوم إجت جابت لك أطفال الحسين

اليوم إجت يمك إبيوم الأربعين ذابله إبسهر العيون إجفونها

يا عباس و من طحت فوق النهر هيه ما شافتك بس سمعت خبر

رادت إتشوفك يخوها بالنظر القوم حالت دونك و ما دونها

تدري يوم الأشد صار كل الأيام إنشغلت إختك عنك إبلم الأيتام

إنشغلت إبنار الذي إتوج بالخيام و لا معين إوياها الله إبعونها

مشت من بعد المصايب و الأحزان و مرت إعله الأهل متطشره أبدان

من وداع الأهل يحرمها الزمان ودعت أبدانكم بعيونها

و هي عله الناقه غريبه إميسره قامت إتودع جثث متوذره

إبهالوضع عافت جثثكم عالثره جثث ليش القوم ميدفنونها

جثث جفنها الداري إمخدمه جثث غسلها يعباس الدمه

عافت إضلوع الحسين إمهشمه إشلونها الشافت إخوها إشلونها

شوفتك حسره يخوها بالصدر من بعد ودعت راحت لليسر

اليوم ردت و إنت بتراب القبر إتريد تحجي لك اليوم إشجونها

يالذي إتكفلت بيها و بالخدر أصبحت عقبك بتعذيب الشمر

و العصي إعله إمتونها إتظل تستمر بغض لخوتها العده إيعذبونها

تذكر الرايه التظلل عله الراس إتبدلت بالسوط عقبك يعباس

و الخدر أصبح سبي و تنظر الناس و بالدواوين العده اينظرونها

إختك الجانت إبسدك يالعضيد طالت إعليها عقب إيدك الإيد

الشمر بيده جابها المجلس يزيد و ما يشوف إخوه الذي إيحامونها

حرمه متيسره و متكلفه إعيال بس عليل إوياها ظل امن الرجال

إبهالعليل و هالغرايب و الأطفال إشلون بعد الوادم يهيبونها

فارقت للأهل راحت ما تعود إيزيد شاف إبعلي السجاد القيود

و المتون أصبحت مثل إمتون إسود ابقيد الوجوه التغير لونها

تنطفي هالنار بضلوع الحرم لا و حق عينك الطفاها السهم

لو أميه إديون عدها بالنقم جان قلنه إتريد منه إديونها