بالعباس و حسين جنينه

إحنه غير حسين ما عدنه وسيله

و الذنوب إهواي جثتها ثجيله

إحنه من عابس أخذنه أفكارنه

داخت أفكار العدو بأسرارنه

أقوى من قلب الحديد إصرارنه

ثبتت إبدرع الشهاده أسوارنه

تحرق إوجوه النواصب نارنه

رسمت إحروف الولاء آثارنه

بينا شيمة عابس...الشجاع الفارس

دوله إحنه يالتريد أخبارنه

مجانين... عله إعناد عذالنه

مجانين... عله الخير أفعالنه

إحنه من غيرة زهير أطباعنه

نشتري العتره و نبيع الباعنه

مبحر ابحر الحسين إشراعنه

فاحت إورود الكرامه إبقاعنه

خسر و دنيه و آخره الما طاعنه

يلوي ذرعان آل أميه إذراعنه

إحنه ضد كل ظالم ...بينه جرح القاسم

قطره من نحر الرضيع أوجاعنه

مجانين... إخذ هاي كلماتنه

مجانين... للحسين دمعاتنه

إحنه عاهدنه و نوفي إعهودنه

صوت أبو در الغفاري إيقودنه

تبعت الحر الرياحي إجنودنه

جف حبيب اللي يسجل زودنه

قلّب التاريخ تلقه إشهودنه

صدت إرياح الضلال إحدودنه

بينه جون الخالد...بينه قيس الصامد

رحمة الباري تظل مقصودنه

مجانين ...و الأنصار سبقونه

مجانين ...بالحسين عرفونه

إحنه عشاق النبي و أحبابه

نحزن الكسر الضلع و إصوابه

نبجي لجل الطايح إبمحرابه

نلطم إبفقد الحسن و إمصابه

نوصل الذبحوا هله و أصحابه

نروي من دمع المصيبه إترابه

الحسين الضامي...عاري جسمه و دامي

سلبوا جيش آل أميه إثيابه

مجانين... عله الطاح بالحومه

مجانين... و الأرواح مالومه

إحنه جند المنتظر و أتباعه

ننظر إبكل الصبر مطلاعه

ما نمل حتى قيام الساعه

نمتثل لأمره و نلبي الطاعه

نرد شيطان الكفر و أشياعه

ترف راية حيدره إعله إذراعه

ينشره إعله إمصاره...عزته و أفكاره

نلتقي إبظله و نعوف اوداعه

مجانين... و الأعداء نفنيها

مجانين... و الأرواح نفديها