عقيمه الدنيه صارت و الزمن أبتر لا أم البنين و لا علي إتكرر

ما يحتاج نبحث بأمر داحي الباب شمس حيدر جليه و ما عليها إحجاب

أشرف جاه عنده إبسيرة الأنساب إسم حيدر كفايه إشنوصفه الحيدر

علي يدري إبجبين العالم إشمختوم علي إمعرفته يعلم بالذي محتوم

وعد طف كربله إبكل يوم يقرب يوم و يوم إبيوم هَم المرتضه يكثر

لواء حسين هو اللي شغل فكره يريده يأمنه بجفوف مقتدره

يريده بالوفه يرف يضمن الثوره يريده إيسر قلب زينب إبوكت الكر

قلب صفحة الأنساب إله مطلب منهو إيليق يتسمه إخو زينب

الهذا الإبن يا أم ينتخب هالأب إنتخب أم البنين الحملت الجوهر

كريمة أصل لهل البيت وفايه علي يدري الوفه مو لفظة و إحجايه

خطب نبع الوفه و الحكمه بالغايه الحكمه إبمر سنين الزمن تتفسر

إنولد عباس و الوالد أخذ يده يقلب جفه و إدموعه عله خده

يقلها إبنج إبجفينه يتفده أخوه حسين و يقدم له هالمنحر

قبّل هالجفوف و خنقته العبره و أخبرها بإبنها و عاقبة أمره

صاحت فدوه إبني المهجة الزهره القلب بحسين يا بو حسين يتصبر

يقلها هالطفل مخلوق لجل حسين روح إبروح قبل الخلقه متخاوين

إبيوم الطف سهم يتسدد الهالعين يطفيها و يصيب إعيون أبو الأكبر

أبو الأكبر يجي له يشوفه عالرمضه عين السهم بيها الثانيه إمغمضه

يشاهد رايته و جف لازم القبضه الوصف عاجز يوصف واقع المنظر

صاحت إشهد و خل تشهد هالوادم أربي لك إوليدي السيده خادم

اليهمني حسين من الطف يرد سالم و لو أولادي كلها الأجله تتوذر

يقلها بالقيامه أم الحسن تسديج كل الناس تشهد لمن إتناديج

بوفاها فاطمه يا فاطمه إتوافيج و تعرض هالجفوف إبساعة المحشر