أنا العباس يا حيدر...لبو السجاد هالمنحر

لضحي البت علي عيني...و أقدم إلها جفيني

فلا تحتار ...يحامي الجار ...أقدم إلها جفيني

أنا شبلك يحيدر... يا بطل خيبر...يا من كورت مرحب

طبيعي إبهمتك يا بويه أتأثر...منو العنده مثل هالأب

ورث منك إجاني السيف يمشكر...سيفي جمرته تلهب

و حق السيف هذا السيف وكت الكر...باجر بالزلم يلعب

اليريد الحتفه يوصل يمي يتوذر...إشحده للخيم يقرب

أنا العباس و إسمي أرعب العسكر...أنا العباس إخو زينب

أنا العباس بالحومه ...صفت هالقوم مهمومه

لفرغ بيهم إهمومي...سنين ناطره اليومي

شهرت السيف...أريد الحيف...الصبر يا بويه ماذيني

فلا تحتار ...يحامي الجار ...أقدم إلها جفيني

أنا الها الواقعه إمتانيها من زغري...يوم الطف ثبت عيدي

من أول دقيقه المرت إبعمري...أحس حسين بوريدي

أخذني حسين حط صدره عله صدري...و صار إيقبل بأيدي

أخويه حسين خجلني و حرت بأمري...لمن صاح لي إعضيدي

حسين ابها الإخوه عظمه القدري...و هو الضمن تخليدي

عهد عاهدته لرخص له دمه نحري...و أعلق خوته إبجيدي

أخويه حسين هيمني...عله الباقين قدمني

و حق هالخوه ما عوفه...إوليدك باجر إتشوفه

نذر منذور...أنا المذخور...أقدم زهرة إسنيني

فلا تحتار ...يحامي الجار ...أقدم إلها جفيني

أنا إشما أحجي عن حسين ما يكفي...و آنه المنخلق لجله

و حق عيناج مهما إنطيت ما وفي...شوفي يا أبو الحمله

أخويه حسين لحظه إجه إبصفي...ألوذ إبسده و بظله

شنو دمي شنو عيناي لو جفي...أصيرن خادم الطفله

اسم حسين بلسم للجرح يشفي...بلسم ما حصل مثله

و إذا جرحي نزف ما ينقطع نزفي...بس هو الذي إيشله

أخويه حسين وافاني...و لا فد يوم جافاني

أضحي المهجه جدامه...و أصير إتراب لجذامه

يبويه الروح... فداه إتروح...و بس هامتي و عيني

فلا تحتار ...يحامي الجار ...أقدم إلها جفيني

يبويه إوصيتك إبعيني أخليها...عليمن تجذب الحسره

إوعدت أمي إبوصيتها أوافيها...وصيتها أمر يجره

توصيني الحبيبه ابقلبي أوفيها...و أنا الوفاي للعتره

عهد آنه نطيت الزينب أحميها...عهد مو لأمي للزهره

و حق عيناج شنهو إتريد أنطيها...ألف يمنه و ألف يسره

و لوين وذروني لآخر نفس أفديها...فداها إتروح كل وذره

لون أوصال أتقطع...بدون الماي ما أرجع

أجيب الماي لطفالي...و لا تتحير إعيالي

أنا السقاي...أنا الوفاي...يبويه لا توصيني

فلا تحتار ...يحامي الجار ...أقدم إلها جفيني

إطلبت من الحسين الرخصه بإلساني...و أخوين حسين أجلني

ردت أبرز و أخمد جمرة أحزاني...ابدموعه حسين عاجلني

يقلي لا تروح إو يمه خلاني...يقلي لحظه إمهلني

سمعت حسين لول مره يرجاني...وحق الزهره خجلني

إلتفت لي إبنظره و بهالنظره بجاني...وداع حسين ألمني

أخويه إبوقفة التوديع أذاني...لسان الحال كلمني

يقلي روح لخيامك...عطاشه إتلوب أيتامك

لونك تنصرع تدري...يخويه ينكسر ظهري

إخذني وياك...بعد عيناك...أظل وحيد تدريني

فلا تحتار ...يحامي الجار ...أقدم إلها جفيني