خُطَ على التُربِ بكفٍ خضيب ...نصرٌ من الله ِ و فتحٌ قريب

بالوفاء ...خُلدت كربلاء ...بالدماء ... خُطَ فوقَ اللواء

نصرٌ من اللهِ و فتحٌ قريب

كل الوجود إبكربله حاير إنشوفه ...يم القمر فوق النهر روحه ملهوفه

ثار الذي عالمشرعه ...عين البتول الدامعه ...إتغسل إجفوفه

محنيه جانت فاطمه ... و القمر يمها

شالت إجفوف إمقدمه ... إتغسلت دمها

صاحت يا سبع القنطره ...هاي البتول الطاهره ...إجفوفك إتضمها

يا عباس ... أقسم إبجفينك

يا عباس ... و السهم لبعينك

يا عباس ... كون أرد لك دِينَك

يا أسدَ الطفِ و ليثَ العرين ...وافيتني أنتَ و أمَ البنين

و اللطيف ... ناظراً للفداء... بالنزيف ...خُطَ فوقَ اللواء

نصرٌ من اللهِ و فتحٌ قريب

يم فاطمه جان الوصي ينظر الرايه ...شاف الدمه فوق العلم كاتب الآيه

حين إنحنه يم رايته ...حيدر غسلها إبدمعته ...روحه شجايه

و من إنحنت هامة علي لإبنه يبجيله ... جن المجد كله إنحنه و إنهدم حيله

و لن هاتف إينادي إبوفه ...آنا الرسول المصطفه ...يمك الليله

يا عباس ...يا كفيل إعيالي

يا عباس ... عالي شانك عالي

يا عباس ... غالي دمك غالي

أملاكُ عرشِ اللهِ عندَ الطفوف ...تبكي و بالجسمِ المسجى تطوف

و الجموع ...رددت لِلنداء ...بالدموع ... خُطَ فوقَ اللواء

نصرٌ من اللهِ و فتحٌ قريب

من طيبه متعني الحسن رايد إيزوره... شاف القمر فيض الدمه حاجب النوره

ناده إبحزن و ابكل أسه ...يا قلعة أصحاب الكسه ...للحمه سوره

قوم إعله زينب يالوفي زينب إميسره ...و إخيام أهلنه إبكربله تلهب إموجره

و حسين أخوك إبهالغرب ...حين اليشوفك عالترب ...ينكسر ظهره

يا عباس ... يالوفي إعتنيتك

يا عباس ... إمن البقيع و جيتك

يا عباس ... عالشريعه إلقيتك

يا أُيها السدُ العظيمِ المنيع ...طوبى لكفٍ بالطفوفِ قطيع

يا شهيد... قالَ فيهِ الولاء... بالوريد ... خُطَ فوقَ اللواء

نصرٌ من اللهِ و فتحٌ قريب

حال الحسين من أوصله ربه بيه عالم ... صار الوجود بأكمله يم قمر هاشم

زينب تعنت للنهر ...من شافت إبدمه القمر ...عالترب نايم

صاحت عفتنه و للحرم من يحاميها... إتخليني وحدي إبكربله هذا تاليها

يا خويه عن هالفاجعه ...شخبرها لأم الأربعه ...بيش أواسيها

يا عباس ... أدري عني إتحامي

يا عباس ... و إنت قلبك ضامي

يا عباس ... تنذبح قدامي

يا ساقيَ العطشى فديتَ الحسين ...يا نورَ عيني يا قطيعَ اليدين

قالَ نوح أيها الأنبياء ...بالجروح... خُطَ فوقَ اللواء

نصرٌ من اللهِ و فتحٌ قريب

محني الظهر رد للخيم دمعته إبعينه ... و لمن لبوها إتلقته نشدته إسكينه

قال له دلالي إنفجع ...واعدني و ما رجع ...عمي جاوينه

ظليت أناطر جيته و أدري يوفينه ...و بجوده يرجع للخدر ابمايه يروينه

أدري بشبل حامي الحمه ...لو عالجمر نار الضمه ...ما يخلينه

يا عباس ...سكنه يا عم آني

يا عباس ... إنت قلت لي تاني

يا عباس ... ما أظن تنساني

قالَ حسينٌ و الدموعُ تسيل ...ماتَ على نهرِ الفراتِ الكفيل

يا عُلاه... قد بكتهُ السماء... من دماه... خُطَ فوقَ اللواء

نصرٌ من اللهِ و فتحٌ قريب