آنه العليله ...و الألم عنواني

آنه العليله ...و هاجروا ولياني

شاءت أقداري...أبتلي إبناري

خيرة أحبابي...فارقوا داري

آنه العليله... و الألم عنواني

قبل دار الأهل واحه... تماثل ريحة الجنه

عمر بحسين مرتاحه... يغذيها العطف منه

زواياها وفه و طيبه ...باهلها الفخر يتغنه

لجن من مرصده الغيبه ...بدال العز صفت ونه

ظلت خليه... من بعد راعيها

ظلت خليه...و الحزن غاطيها

ظل ينادمها...بس هوى الداري

خيره أحبابي... فارقوا داري

هلي ضعنوا عله الكوفه... صفت دار السبط وحشه

هجرها الفرح و إطيوفه ...قبل جانت شمس غبشه

وحيده و روحي ملهوفه... أحس عمري غفه إبنعشه

عليّ سيطر نبض خوفه... الدمع من دم صبغ رمشه

طفله و غريبه ...و المرض ماذيني

طفله و غريبه...و الدهر واليني

أدعي تنقذني... رحمة الباري

خيره أحبابي... فارقوا داري

أساهر و أحسب المدمع ...مثل جمر الغضه عله الخد

و أشوف القمر من يطلع... على بيتي قمر أسود

بعدهم بس شجن أسمع ...و لا طير الأمل غرّد

العمر يخلص و لا يرجع... أبويه اللي عليّ أبعد

طول سفرهم... و العلل تبرالي

طول سفرهم... بددوا آمالي

خابت أحلامي... و الكدر ساري

خيره أحبابي... فارقوا داري

يقولون الصبر يجدي... نشف صبري و بعد شصبر

حرت من يا حزن أبدي... أجبر و الحزن يكسر

و لا عنهم خبر عندي... حزينه و ضاع المخبر

أظل اليا زمن وحدي... أسيرة هم أطوق المر

صبراً جميلا... يا زمن ساعدني

صبراً جميلا...هالسفر ضاهدني

ابضعف إجروحي... تاهت افكاري

خيره أحبابي... فارقوا داري

ترف عيني و خفت منها... رفيف اليجيب الشر

تظن روحي و صدق ظنها... تلاقه السيف و المنحر

أبو الغيره بعد عنها ...جبينه إعله الثره إمعفر

قسه إعليها و كثر حنها... طبر هامة علي الأكبر

فوق الوطيه ...جالبدر بأنواره

فوق الوطيه...ينزف من أكتاره

أذكر أطباعه... و الدمع جاري

خيره أحبابي... فارقوا داري

مصايب نزلت إبداري... تشيب مهجة اليرضع

إجني و زادت إغياري... جوني إبقلبي المصدع

هلي منهم و لا طاري ...قضوا كل واحد إمقطع

أبويه أصبح جسد عاري... تفايض دم عله المصرع

زينب وحيده... من وقع واليها

زينب وحيده...تشتكي الباريها

وقعوا إخواني... و خدري و إخماري

خيره أحبابي... فارقوا داري