خويه ما أدري أصير إبيا فكر أحجي عن حالي عقب ذاك الخدر

لو يخويه اليوم منك أعتذر راحت أطفالك و أخبرك بيها

منها ماتت قبلما ميصير اليسر سحّقتها إبخيلها أهل الغدر

و منها ماتت باليسر يبن الطهر بالسياط الكسروها إعليها

طفله يبن أمي امن الناقه هوت بالسياط إتعذبت و إتروعت

لون ما عينك عله الطفله ومت جان ظلت تايهه إبواديها

مرتفع عالرمح راسك يا ذبيح ترعه لطفالي و تعاين لليطيح

إسمعت هالطفله يبو اليمه تصيح و عالرمح راسك و ينظر ليها

و ثبت رمح الشال راسك بالأثر وضح السجاد للقوم الخبر

وين قال الراس شابح للنظر إهناك طفله امن الضعن ناسيها

رحت يبن أمي و شفت شوف العيون امن السياط إشلون مسوده المتون

إشلون دار الدهر بأطفالك إشلون اللي قطع راسك غده يوليها

نفس هالطفله اليتيمه امن الأيتام شافتك بالطيف بخرابة الشام

فزت امن النوم من غفوة أحلام إتريد أبوها و هاي شتحاجيها

سمع بيها إيزيد وين الرحمه وين آمر إيودوا إلها راس الحسين

ما دره للراس لو شبحت العين إتموت ليش الراسك إيراويها

و قبل هالطفله يبن داحي الباب راسك إبمجلسه إيعرضه للرباب

غده إيذوب جبدتي إبنار المصاب للرباب إمن أسمع إيناديها

إشلون بالديوان حالي يا غريب راسك إبجف نذل و بدمه خضيب

عالثره إبطف كربله جسمك سليب و عند أميه راسك و طاغيها