راسك يخويه مشبوحه عينه ...إبراس العوالي و خايف علينه

يخويه و زين أعرفك ...غيور و هذا وصفك ...خايف علينه

من درب الصعب ممشاه مشيت و عالترب عفتك

و لو جان الأمر بيدي ما يحسين فارقتك

لأني أدري بأطباعك يخويه الهالسبب شفتك

ويايه إرسلت راسك تريد إتسلي قلب إختك

حته يخويه و جثتك رميه...خايف بقيت و قلبك عليه

و أنا أدري إشيخوفك ...غيور و هذا وصفك ...خايف علينه

راسك بيه نفس طبعك نفس الطيبه و الإحسان

من شاف إختك إبضيجه ضاج و هوه فوق الزان

لأنه يدري بالقرآن عني تنجلي الأحزان

قام و هوه عالعسال ليه إيرتل القرآن

تقره الكتاب و حين اللي تقره...هالغايه جانت قلبي تسره

و تدير إعليه طرفك ...غيور و هذا وصفك ...خايف علينه

يخويه و هذي ما جانت تمرني حته بخيالي

و أعاتب بالي لو فد يوم حجه عن مصرعك بالي

و تالي مدري شنهو الصار و راسك أنظره إقبالي

يبره إبعينه للأطفال و نوبه إبعينه يبرالي

من عينه يحجي و أفهم كلامه ...حفظي يا زينب بعدي اليتامه

ذبيح و بادي عطفك ...غيور و هذا وصفك ...خايف علينه

إعيونك خلها مفتوحات بالدرب و يسلوني

أدري بالدموع إحروف من إتهل يحاجوني

لجن غمضها لو طاحت يراسي إبشوفك إعيوني

ما أريدك تصد و إتشوف لو ضربوني بمتوني

حالي التشوفه أدري يألمك...إبضربة إمتوني تتذكر أمك

ابمتن أمك أحلفك ...غيور و هذا وصفك ...خايف علينه

رمح اللي حمل راسك ما جنه رمح لاجن

قول إشما تريد إتقول ما يتعذر رايي الظن

شفته إبحال يا خويه فكري الكون بيه يصفن

كل ساعه و على محمل وقف و إعليه يتضمن

و إعله المحامل لمن يمرها...رايد يخويه إيعدّل سترها

إبكثر ما يجري نزفك ...غيور و هذا وصفك ...خايف علينه